Փաստ ինֆո

ՀՀ վերաքննիչ քրեական դատարանը դեկտեմբերի 12-ին վերացրել է Երեւանի ընդհանուր իրավասության դատարանի որոշումը՝ «Մարտի 1»-ի քրեական գործով քննչական խմբի նախկին ղեկավար Վահագն Հարությունյանի նկատմամբ որպես խափանման միջոց կալանավորումն ընտրելու մասին։ Նշենք, որ առաջին ատյանի դատարանի որոշման դեմ բողոք էր ներկայացրել պաշտպանական կողմը։

Ի պատասխան «Փաստինֆո»-ի հարցման  այս մասին ասաց Վահագն Հարությունյանի պաշտպան Միհրան Պողոսյանը։

«Մենք դեռ դատարանի որոշումը չենք ստացել եւ ամբողջությամբ ծանոթ չենք դատարանի վերլուծություններին եւ եզրահանգումներին։ Երբ որոշմանը ծանոթանանք՝ կհայտնենք մեր դիրքորոշումը, կորոշենք մեր հետագա անելիքները»,- ասաց Մ.Պողոսյանը։

Ավելի վաղ հայտնել ենք, որ ՀՔԾ-ն Վահագն Հարությունյանին մեղադրում է ապացույցները կեղծելու մեջ, իբր նրա հանձնարարությամբ ՀՀ զինված ուժերի մասնակցության ու վերջիններիս կողմից հրազենի ապօրինի գործադրման իրական հանգամանքները թաքցնելու և վերջիններիս կողմից կատարած գործողությունները հերքելու նպատակով անհրաժեշտ է դեպքի վայրի տարբեր տեղամասերից զննությամբ հայտնաբերված տարբեր տեսակի և տրամաչափի հրազեններից կրակված, իրեղեն ապացույց հանդիսացող շուրջ 1000 պարկուճները փոխարինվել ՀՀ ոստիկանության զորքերի սպառազինության մեջ մտնող նույն տեսակի այլ հրազեններից կրակված պարկուճներով:

«Իհարկե, նման բան չի եղել, լինել չէր կարող: Ես չգիտեմ՝ ինչ դնեմ սրա անունը, սա քրեադատավարության ոլորտից դուրս հետապնդում է իմ անձի նկատմամբ»,- հայտարարել է Վ.Հարությունյանը՝ ավելացնելով. «Ի՞նչ է նշանակում դա, հիմա ՀՔԾ-ի որևէ քննիչի եկեք հարցնենք՝ ոստիկանության քանի՞ բարձրաստիճան պաշտոնյայի կարող ես կանչել ու նման հանձնարարություն տալ: Քննիչը ո՞նց կարող է ոստիկանության բարձրաստիճան պաշտոնյային հանձնարարություն տալ: Քննիչի լիազորությունները հստակ նկարագրված են քրեական դատավարության օրենսգրքում»:

Վ.Հարությունյանի խոսքերով՝ իրենից ինչ-որ համագործակցություն են ակնկալում և այլն։ «Քրեական գործը եզակի այն քրեական գործերից է եղել, որը քննվել է հրապարակայնության ամենագերադրական մակարդակի վրա: Որևէ քրեական գործ այդքան հրապարակային չի ներկայացվել հանրությանը, որքան մարտի 1-ի գործը: Գործում առկա փաստաթղթերի ամբողջ ծավալը եղել է շատ մարդկանց, փաստահավաք խմբի ԱԺ հանձնաժողովի տրամադրության տակ»,- մամուլին տված հարցազրույցում ասել է Վահագն Հարությունյանը, ով ներկայումս գտնվում է Մոսկվայում՝ բուժման նպատակով:

Աղբյուր` Փաստինֆո