Փաստ ինֆո

ՀՀ նախկին փոխվարչապետ Արմեն Գեւորգյանն այսօր ներկայացել է Երևանի ընդհանուր իրավասության դատարան՝ մասնակցելու իր նկատմամբ որպես խափանման միջոց կալանավորումն ընտրելու մասին ՀՔԾ քննիչի միջնորդության քննարկմանը։

Ավելի վաղ տեղեկացրել ենք, որ ՀՔԾ-ն լրացրել է Արմեն Գեւորգյանին ավելի վաղ արդարադատությանը խոչընդոտելու համար առաջադրված մեղադրանքը եւ եւս երեք նոր մեղադրանք առաջադրել Մարտի 1-ի քրեական գործի շրջանակներում ՀՀ քրեական օրենսգրքի 38-300.1-րդ հոդվածի 1-ին մասով՝ Սահմանադրական կարգը բռնի տապալելուն օժանդակելու, ՀՀ Քրեական օրեսնգրքի 311-րդ հոդվածի 4-րդ մասի 2-րդ կետով՝ առանձնապես խոշոր չափերով կաշառք ստանալու և ՔՕ-ի 190-րդ հոդվածի 3-րդ մասի 1-ին կետով՝ փողերի լվացման համար։
«Փաստինֆո»-ի հաղորդմամբ՝ նիստից առաջ Արմեն Գեւորգյանը հայտարարեց, որ մեղադրանքին ծանոթ է եւ այն չի ընդունում։

«Մեղադրանքին ծանոթ եմ, հասկանալի է, որ  այն չեմ ընդունում։ Մնացած բոլոր պարզաբանումները իմ փաստաբանները կանեն  նիստից հետո»,- դատարանի մոտ լրագրողների հարցերին ի պատասխան ասաց Արմեն Գևորգյանը։

Դիտարկմանը, թե նրան բազմաթիվ մեղադրանք է առաջադրվել, Գևորգյանը արձագանքեց. «Եկեք ենթադրություն չանենք, հանգիստ մեր կյանքով ապրենք»։

Դատական նիստը՝ դատավոր Արման Հովհաննիսյանի նախագահությամբ, վերսկսվել է։

Հիշեցնենք, որ միջնորդության քննարկումն դեռ սկսվել էր երեկ, սակայն պաշտպանական կողմից միջնորդությամբ հետաձգվեց, որպեսզի հնարավորությւոն ունենան ծանոթանալ նյութերին։

Աղբյուր` Փաստինֆո