Փաստ ինֆո

Երևան քաղաքի ընդհանուր իրավասության դատարանի Կենտրոն նստավայրում նախաքննական մարմնի միջնորդությամբ` ԱԺ պատգամավոր Մանվել Գրիգորյանի խափանման միջոց կալանքը ևս երկու ամսով երկարաձգելու հարցի քննությունը ավարտվեց:  Ակնկալվում է, որ դատարանի որոշումը կհրապարակվի այսօր։ Այս մասին լրագրողների հետ զրույցում նշեց Գրիգորյանի պաշտպան Արսեն Մկրտչյանը:

Պաշտպանի խոսքով` Մանվել Գրիգորյանը հանդես է եկել ելույթով եւ չի ընդունել առաջադրված մեղադրանքը։ Այդուհանդերձ՝ Գրիգորյանն ասել է, որ թեպետ ինքն իրեն մեղավոր չի ճանաչում, բայց պատրաստ է իր վրա վերցնել նաև հարազատներին, մերձավորներին մեղսագրվող արարքների համար նախատեսվող պատասխանատվությունը։

Փաստաբանի տեղեկացմամբ՝  Գրիգորյանին գրավով ազատ արձակելու մասին դատարանին միջնորդություն է ներկայացվել՝ 20 մլն դրամի չափով։

«Սա իրատեսական չափ է և հնարավոր է այլ խողովակներով այդ գումարը գտնել ու մուծել», - ասաց փաստաբանը։

Խափանման միջոցի հարցի քննությունն իրականացվում է դատավոր Մարինե Մելքոնյանի նախագահությամբ։ Դատավորը, ըստ փաստաբանի, կանխակալ վերաբերմունք ունի այս գործով և շատ հեշտ հնարավոր կլինի նախաքննական մարմնի կողմից նրա նկատմամբ ճնշում գործադրելը։

Փաստաբանն անդրադարձավ նաեւ պետությանը ԵԿՄ նախկին նախագահ Մանվել Գրիգորյանի 40 անուն անշարժ գույքի նվիրաբերմանը՝ նշելով, որ  դա  ամենևին էլ պատիժը մեղմացնող քայլ չէր ։

«Ես խնդրում եմ զերծ մնալ նման մեկնաբանություններից։ Մանվել Գրիգորյանը Արցախի հերոս է, հերոսաբար կռվել է, հերոսաբար ապրել է և գույքի նվիրաբերումը պետությանը պարզապես աջակցություն է պետությանը, որը միշտ արվել է։ Դա կաշառք չէ, դա մեղքը մեղմելու քայլ չէ, այլ մարդու ապրելակերպ», - ասաց փաստաբանը։

Հիշեցնենք, որ Մանվել Գրիգորյանի կողմից շուրջ 40 անուն անշարժ գույք պետությանը, մասնավորապես Արշալույս համայնքին նվիրաբերելու մասին հայտարարել էր ՀՔԾ պետ Սասուն Խաչատրյանը։

Աղբյուր` Փաստինֆո