Փաստ ինֆո

Երևան քաղաքի ընդհանուր իրավասության դատարանը՝ դատավոր Մարինե Մելքոնյանի նախագահությամբ,  ԱԺ պատգամավոր Մանվել Գրիգորյանի խափանման միջոցը երկարացնելու միջնորդության վերաբերյալ որոշումը կհրապարակի վաղը։  «Փաստինֆո»-ի փոխանցմամբ՝ դատարանը հեռացել է  խորհրդակցական սենյակ եւ նիստ նշանակել դեկտեմբերի 12-ին՝ ժամը 14:00-ին, որի ժամանակ էլ կհրապարակվի որոշումը:

Նշենք, որ ՀՔԾ-ի քննիչը միջնորդություն է երկայացրել եւս երկու ամսով կալանավորումը  երկարաձգելու մասին։

Ավելի վաղ տեղեկացրել ենք, որ պաշտպանական կողմը դատարանին ներկայացրել է 20 միլիոն դրամ գրավի միջնորդություն՝ կալանավորման փոխարեն:

«Սա իրատեսական չափ է, և հնարավոր է այլ խողովակներով այդ գումարը գտնել ու մուծել»,-  ասել է փաստաբան Արսեն Մկրտչյանը։ 

Մանվել Գրիգորյանին մեղադրանք է առաջադրվել Քրեական օրենսգրքի 235-րդ հոդվածի 2-րդ մասով՝ ապօրինի կերպով ռազմամթերք ձեռք բերելու և այլ անձանց հետ նախնական համաձայնությամբ պահելու համար, ինչպես նաև քրեական օրենսգրքի 179-րդ հոդվածի 3-րդ մասի 1-ին կետով՝ մի խումբ անձանց հետ նախնական համաձայնությամբ յուրացման եղանակով իր վստահությանը հանձնված առանձնապես խոշոր չափերով ուրիշի գույք հափշտակելու համար:

Հունիսի 16-ին Մանվել Գրիգորյանը ձերբակալվել է, ապա՝ հունիսի 19-ին Ազգային ժողովի պատգամավորների քվեարկությամբ, զրկվել պատգամավորական անձեռնմխելիությունից ու դատարանի որոշմամբ կալանավորվել:

Կալանքի տակ գտնվելու ընթացքում պատգամավորի պաշտպանները բազմիցս բարձրաձայնել են նրա առողջական խնդիրների մասին՝ նշելով, որ իրենց պաշտպանյալի կյանքին վտանգ է սպառնում:

Աղբյուր` Փաստինֆո