Փաստ ինֆո

Ընդամենն օրեր առաջ Վերաքննիչ քրեական դատարանը որոշեց ուժի մեջ թողնել ՀՀ երկրորդ նախագահ Ռոբերտ Քոչարյանի նկատմամբ կալանավորումը որպես խափանման միջոց ընտրելու վերաբերյալ առաջին ատյանի դատարանի որոշումը: Ի՞նչ է տեղի ունեցել Վերաքննիչ դատարանում 5 օր շարունակ տևած դատական նիստերի ընթացքում:

«Փաստինֆո»-ի հավաստի տեղեկություններով՝ մարտի 1-ի գործով նախաքննություն իրականացնող Հատուկ քննչական ծառայության քննիչը վերաքննիչ դատարանում բողոքի քննության ժամանակ վիճակահանությամբ ընտրված դատավոր Ռուբիկ Մխիթարյանին բացարկ է հայտնել՝ նշելով, որ դատավորը կոմպետենտ չի տվյալ բողոքը քննելու համար:

Եվ որ ամենակարևորն է՝ քննիչի այս դիրքորոշման դեմ չի առարկել նաեւ դատախազությունը:
Ստացվում է, որ վերաքննիչ դատարանում բողոքի քննությանը մասնակից 6 դատախազները, այդ թվում՝ Գլխավոր դատախազը, պաշտպանական կողմի հետ համակարծիք են եղել:
Ասել է թե, գործ ունենք մի բացառիկ իրավիճակի հետ, երբ դատավարության բոլոր կողմերն էլ կասկածի տակ են դնում դատավորի մասնագիտական որակները:

Նշենք, որ բողոքի քննության վերջին դատական նիստը նշանակված էր դեկտեմբերի 4֊ին և դատարանն այդ օրը հեռացել էր խորհրդակցական սենյակ՝ հայտարարելով, որ որոշումը կհրապարակվի դեկտեմբերի 7֊ին՝ քարոզարշավի վերջին օրը։

Ավելի վաղ տեղեկացրել ենք, որ ՀՀ երկրորդ նախագահ Ռոբերտ Քոչարյանին մեղադրանք է առաջադրվել ՀՀ քրեական օրենսգրքի 300.1-ին հոդվածի 1-ին մասով և հուլիսի 27֊ին առաջին ատյանի դատարանը որպես խափանամն միջոց էր ընտրել կալանավումը, սակայն օգոստոսի 13-ին Վերաքննիչ դատարանի որոշմամբ անձեռնմխելիության հիմքով նա ազատ արձակվեց: Ինչից հետո էլ վճռաբեկ բողոք էր ներկայացվել թե Գլխավոր դատախազի թե Ռ․ Քոչարյանի պաշտպանական թիմի կողմից ։ Նոյեմբերի 15֊ի որոշմամբ՝ Վճռաբեկ դատարանը մասնակի բավարարեց Գլխավոր դատախազի բողոքը և գործն ուղարկեց նոր քննության, միևնույն ժամանակ մերժելով փաստաբանական թիմի բողոքները:

Աղբյուր` Փաստինֆո