Փաստ ինֆո

ՀՀ առաջին փոխվարչապետի պաշտոնակատար Արարատ Միրզոյանն անդրադարձավ խորհրդարանական արտահերթ ընտրություններին քաղաքացիների մասնակցության ցածր ցուցանիշի հետ կապված խոսակցություններին:   

«Այստեղ բազում են խնդիրները: Իրականում մասնակցությունը ցածր չէ և ոչ էլ բարձր է: Երկրորդ, մենք պետք է իմանանք, թե որ թվից ենք հաշվում այդ տոկոսը: Համացանցում էլ բազմաթիվ են պնդումներն այն մասին, որ իրականում երկրում գտնվող ընտրողների թիվն ավելի փոքր է քան ավանդաբար ընդունվել է որպես հիմք հաշվարկի համար: Այս առումով, միգուցե մի քանի տոկոս իրական պատկերն ավելի է, քան վիճակագրական տվյալները կարող են խոսել: Երրորդ, ազատ, ժողովրդավարական հասարակարգերում այնուամենայնիվ, մասնակցության բարձր տոկոս չի գրանցվում: Այնպես որ, մեդալը երկու կողմ ունի»,-  ասաց Միրզոյանը:

Ըստ նրա՝ դեկտեմբերի 9-ին տեղի են ունեցել ազատ, արդար, թափանցիկ և ժողովրդավարական ընտրություններ: «Ազատություն» ռադիոկայանի տաղավարում նա նշել է, որ կապ չունի, թե ով կլինի առաջին, երկրորդ կամ երրորդ քաղաքական ուժը խորհրդարանում, այլ  պետք է արձանագրել, որ այս ընտրություններում չկար վերևից թելադրող և համակարգված գործընթացներ՝ ապօրինի կերպով ազդելու ընտրողների կամարտահայտության վրա:

«Ամենամեծ խախտումը, որի մասին այսօր լսել եմ , դա տեղամասերի մոտ կուտակումներն էին, որոնք էլ լոկալ  բնույթ էին կրում, ոչ համակարգային: Եվ այս դեպքում անմիջապես ահազանգվել է իրավապահ մարմիններին:  Նրանք կատարել են իրենց գործառույթները և ապահովել այդ մարդկանց հեռացումը 50 մետր շառավղից այն կողմ»,- ասաց Միրզոյանը:

Նրա խոսքով` իրավապահ համակարգը, ի տարբերություն նախորդ ընտրությունների, չի ստանձնել չեզոք դիտորդի դեր, այլև ընդհակառակը լավագույն ջանքերն է գործադրել , որ իր գործառույթները իրականացնի` ապահովելով ընտրությունների բնականոն ընթացքը:

Հայաստանում  արտահերթ խորհրդարանական ընտրություններին մասնակցելու իրավունք ունեցող 2 մլն 592 հազար 479 ընտրողներից քվեարկությանը մասնակցել է 1 միլիոն 260 հազար840 քաղաքացի կամ 48,63 տոկոսը:

Աղբյուր` Փաստինֆո