Փաստ ինֆո

Կարեն Դեմիրճյանի անվան մարզահամերգային համալիրում չարաշահումները հիմնականում վերաբերում են պահակախմբին։ Ինչպես այսօր կառավարության նիստից հետո լրագրողներին հայտնեց Պետական գույքի կառավարման կոմիտեի նախագահ Նարեկ Բաբայանը, մրցույթի արդյունքներով պահակախմբում 24 հոգի պետք է աշխատեին, բայց փաստացի աշխատում է 15 հոգի։

«Տարբերությունն ամսական շուրջ 1 մլն դրամ է, որը վճարվում է այդ ծառայությունն ապահովելու համար, բայց գործն իրականում չի կատարվում»,- ասաց Ն.Բաբայանը։

Ըստ նրա՝ որոշակի ռիսկեր կան նաև սահադաշտի հետ կապված, այսինքն՝ ցույց տրված մուտքերն իրականությանը չեն համապատասխանում. «Վստահաբար՝ ավելի շատ մարդ է օգտվել սահադաշտից, քան ցույց է տրվել»։

Համալիրի տնօրեն Վազգեն Ասատրյանի հետ պայմանագրի խզման վերաբերյալ Նարեկ Բաբայանը նշեց, որ Ասատրյանը ծանուցված է եղել մայիսին, որ իր պայմանագիրն ավարտվում է հուլիսի 1-ով, և նոր պայմանագիր չի վերակնքվելու և, ըստ էության, որոշումն արդեն պատրաստ էր, բայց հաշվի առնելով Ֆրանկոֆոնիայի միջոցառումները, երկարացվել է 5 ամսով, և նորից 1 ամիս առաջ ծանուցվել է, որ պայմանագիրը չի երկարաձգվելու, և անցկացվելու է մրցույթ. «Այն նախատեսվում է հունվարի վերջին, անցկացվելու է լայն իրազեկմամբ, որպեսզի բոլոր ցանկացողներն իրենց ծրագրերով հանդես գան, և շատ ավելի բաց, թափանցիկ ու մրցակցային պայմաններում անցկացված մրցույթ լինի»։

Աղբյուր` Փաստինֆո