Փաստ ինֆո

ԱԱԾ նախկին ղեկավար, ՀՀԿ ցուցակով պատգամավորության թեկնածու առաջադրված Դավիթ Շահնազարյանը քիչ առաջ հայտարարեց, որ իր հանդեպ իրականացվում է քաղաքական հետապնդում, որի հրահանգը հրապարակայնորեն տրվել է արձակուրդում գտնվող ՀՀ վարչապետի ժամանակավոր պաշտոնակատարի կողմից։

Նա տեղեկացրեց, որ երեկ ուշ երեկոյան իրեն զանգահարել են ԱԱԾ-ից, հետաքրքրվել իր գտնվելու վայրի մասին եւ նրան փոխանցել մի գրություն, որով հրավիրել են իրեն ներկայանալ ԱԱԾ։ Շահնազարյանի խոսքերով՝ նա գրությունը վերցրել է եւ խոստացել ԱԱԾ գնալ այսօր ժամը 13-ին, սակայն առավոտյան տարածված հաղորդագրությունից հետո անիմաստ է համարում այնտեղ գնալը։

«Պատրաստվում էի գնալ այսօր այնտեղ և անել հայտարարություն, բայց ինձ համար զարմանալի էր, որ ԱԱԾ-ն ինքը հարապարակեց այս ամենը մոտ ժամուկես-երկու ժամ առաջ: Դրանից հետո անիմաստ է ժամանակ կորցնել և գնալ այնտեղ: Ասելու էի ընդամենը, որ այս ամենը համարում եմ քաղաքական հետապնդում, որի հրահանգը հրապարակայնորեն նրանց տվել է արձակուրդում գտնվող ՀՀ վարչապետի ժամանակավոր պաշտոնակատարը և դրանից հետո ուղղակի դուրս գալ այնտեղից», - նշեց նա:

Շահնազարյանն ընդգծեց, որ որոշել էր գնալ ԱԱԾ նաև այն պատճառով, որ ինքը նախկինում ղեկավարել է այդ կառույցը և անցած 23 տարիների ընթացքում որևէ բացակասական գնահատական այդ կառույցին չի տվել։ Այսօր, նրա կարծիքով, ՀՀ-ում իրավական կառույցներ գոյություն չունեն, դրանք պատժիչ կառույցներ են, որոնք պետության հետ ոչ մի կապ չունեն և պաշտպանում են միայն ու միայն Փաշինյանի շահերը:

Դ.Շահնազարյանը կրկին պնդեց նախօրեին Արցախի հարցով հնչեցրած հայտարարությունները՝ ընդգծելով. « Ով ընտրի իշխող կուսակցությանը, նրա ձայնը կլինի կրակոց Արցախի վրա»:
Անդրադառնալով երեկ Նիկոլ Փաշինյանին բանավեճի հրավիրելու իր առաջարկին՝ Շահնազարյանն ասաց, որ Փաշինյանը կարող էր ընդունել բանավեճի հրավերը և բարձրաձայնել, թե որտեղ է ինքը սխալվել:

«Բայց ի՞նչ է ասել վարչապետը, ըստ էության, ասել է՝ գնա, Արցախի հարցը կքննարկես ԱԱԾ-ում: Էդ ինչի՞ վարչապետը երեկ վախեցավ գալ, հո չէր գալու ցուցմունք տալու: Ինքը ցուցմունք տալու է մեղադրյալի կարգավիճակով, դրանում կարող եք չկասկածել, սա սպառնալիք չէ, սա խոստում է», - ասաց նա:

Աղբյուր` Փաստինֆո