Փաստ ինֆո

Հայաստանի արդեն լուծարված Ազգային ժողովի վերջին հերթական նիստը նախատեսված է այսօր,սակայն քվորւմ չկա։ Այս պահին գրանցվել է ընդամենը 25 պատգամավոր, մինչդեռ անհրաժեշտ է 53 պատգամավորի ներկայությունը՝ քվորումն ապահովելու համար։

Օրակարգում ընդգրկված է 5 հարց, որից առավել հետաքրքիրը ՀՀԿ խմբակցության պատգամավոր Արամ Հարությունյանի նկատմամբ քրեական հետապնդում հարուցելուն համաձայնություն տալու, նաեւ նրան ազատությունից զրկելուն համաձայնություն տալու վերաբերյալ հարցն է:

Քվորումը չապահովելու դեպքում նիստը թերեւս չի կայանա եւ Արամ Հարությունյանին պատգամավորաան անձեռնմխելիությունից զրկելու մասին միջնորդությունը չի քննարկվի։ Նշենք, որ դեկտեմբերի 24-ին այլեւս ավարտված կհամարվի այս գումարման ԱԺ-ի լիազորությունները եւ Արամ Հարությունյանն ինքնաբերաբար կզրկվի անձեռնմխելիությունից, քանի որ նա չի առաջադրվել որպես պատգամավորի թեկնածու։

Հիշեցնենք, որ ՀՀ գլխավոր դատախազությունը նախօրեին հաղորդագրություն է տարածել առ այն, որ 2015թ. սեպտեմբերի 11-ին պաշտոնատար անձի կողմից առանձնապես խոշոր չափերով կաշառք ստանալու դեպքի առթիվ ՀՀ հատուկ քննչական ծառայությունում ՀՀ քրեական օրենսգրքի 311-րդ հոդվածի 4-րդ մասի 2-րդ կետով հարուցված քրեական գործի նախաքննությամբ ձեռք բերված բավարար ապացույցների համակցությումբ հիմնավորվել է, որ ՀՀ Ազգային ժողովի պատգամավոր Արամ Հարությունյանը 2008թ. զբաղեցնելով ՀՀ բնապահպանության նախարարի պաշտոնը, միաժամանակ որպես «Ընդերքի օգտակար հանածոների շահագործման նպատակով ուսումնասիրության հատուկ լիցենզիաներ» տրամադրող միջգերատեսչական հանձնաժողովի նախագահ, Սյունիքի, Գեղարքունիքի, Լոռու, Կոտայքի մարզերի գունավոր մետաղների թվով 10 հանքերևակումների ուսումնասիրության և շահագործման հատուկ լիցենզիաներ տրամադրելու համար, Ս. Հ.-ից պահանջել և միջնորդավորված եղանակով ստացել է 14մլն ԱՄՆ դոլար առանձնապես խոշոր չափերով կաշառք:

Ձեռք բերված ապացույցների համակցությունը բավարար հիմք է տալիս ՀՀ Ազգային ժողովի պատգամավոր Արամ Հարությունյանին սույն գործով ներգրավելու որպես մեղադրյալ և մեղադրանք առաջադրելու առանձնապես խոշոր չափերով կաշառք ստանալու համար՝ ՀՀ քրեական օրենսգրքի 311-րդ հոդվածի 4-րդ մասի 2-րդ կետով և հանցավոր ճանապարհով ստացված եամուտների օրինականացման համար՝ 190-րդ հոդվածի 3-րդ մասի 1-ին կետով։

ՀՀ գլխավոր դատախազ Արթուր Դավթյանը միջնորդություններ է ներկայացրել ՀՀ Ազգային ժողովին, ի դեմս ՀՀ ԱԺ նախագահի՝ տալու համաձայնություն ՀՀ Ազգային ժողովի պատգամավոր Արամ Հարությունյանի նկատմամբ քրեական հետապնդում հարուցելուն, ինչպես նաև նրա նկատմամբ կալանավորումը որպես խափանման միջոց կիրառելուն:

ԱԺ նախագահ Արա Բաբլոյանն արդեն հայտարարել է, որ միջնորդություններն ստացել են։

Աղբյուր` Փաստինֆո