Փաստ ինֆո

«Պարոն Քոչարյանը դատարանում ուղղակի նկարագրեց այն իրավիճակը, որը գոյություն ուներ, երբ իր կողմից այդ գործողություններն իրականացվել են: Նկարագրեց, թե ինչ էր կատարվում, ինչ մտավախություններ կային, նկարագրեց, թե ինչ պայմաններում ինչ ելակետային տվյալների հիման վրա է արտակարգ դրություն մտցրել»,- այսօր Վերաքննիչ քրեական դատարանում լրագրողներին ասաց Ռոբերտ Քոչարյանի փաստաբան Հայկ Ալումյանը՝ մանրամասներ ներկայացնելով դատական նիստից:

Ավելի վաղ հայտնել ենք, որ նիստին մասնակցել է նաեւ Ռոբերտ Քոչարյանը եւ հայտարարությամբ հանդես եկել։

ՀՀ երկրորդ նախագահն անդրադարձել է նաեւ վիճահարութ 0038 հրամանին։ Հայկ Ալումյանի խոսքերով՝ իրենք չեն ասում, որ այդպիսի հրաման գոյություն չի ունեցել: «Այդ հրամանի տեքստը դուք այնպես եք պատկերացնում: Հիմա երբ որ դուք կարդաք այդ հրամանը, շատ կհիասթափվեք: Մենք չենք ասում՝ այդպիսի հրաման չի եղել, բայց ասում ենք, որ այն, ինչ գործի մեջ դրված է, չի համապատասխանում… Մենք ասում ենք՝ դա ՊՆ-ից չի վերցված, հենց այն հրամանից չի վերցված, որն իրականում գոյություն է ունեցել: Թե հիմա իրական հրամանը ինչով է տարբերվելու այն հրամանից, որը կա գործի մեջ, այ դա է մեզ հետաքրքրում»,- ասաց նա: Հարցին, թե Քոչարյանը հիշո՞ւմ է հրամանի բնագիրը, նա պատասխանեց. «Պարոն Քոչարյանն այդ հրամանի հետ կապված որոշ բաներ ասել է, որը ես հիմա չէի ուզի հրապարակել»:

Այսօրվա դատական նիստում հանդես են եկել նաեւ դատախազները՝ իրենց առարկությունները ներկայացնելով ՀՀ երկրորդ նախագահ Ռոբերտ Քոչարյանի պաշտպանների բողոքի վերաբերյալ։

Հ.Ալումյանի խոսքով` առարկությունները հիմնականում ներկայացրել է ՀՀ գլխավոր դատախազ Արթուր Դավթյանը: «Առարկությունները հիմնականում ներկայացնում էր գլխավոր դատախազ Արթուր Դավթյանը: Նա մեր բոլոր փաստարկներին փորձում էր անդրադառնալ: Չէի ասի, որ համոզիչ էին նրա հակափաստարկները, բայց, համենայնդեպս, մանրակրկիտ աշխատել է` փորձել է դետալ առ դետալ իր հակափաստարկները ներկայացնել, հատկապես՝ անձեռնմխելիության հետ կապված»,- ասաց Ալումյանը: Պաշտպանը նշեց, որ մեղադրող կողմը ընդմիջումից հետո շարունակելու է իր առարկությունները ներկայացնել:

Աղբյուր` Փաստինֆո