Փաստ ինֆո

«Ես հույս ունեմ, որ պատգամավորները չեն խոչընդոտի կոռուպցիայի դեմ պայքարին և արդար քննությանը»,- Արարատ քաղաքում ընտրողների հետ հանդիպման ժամանակ հայտարարեց վարչապետի պաշտոնակատար Նիկոլ Փաշինյանն՝ անդրադառնալով Ազգային ժողովի պատգամավոր Արամ Հարությունյանին անձեռնմխելիությունից զրկելու վերաբերյալ գլխավոր դատախազի ԱԺ ներկայացրած միջնորդությանը։

«Արամ Հարությունյանի հարցով մտահոգություն է հնչում, որ վաղը կամ մյուս օրը Ազգային ժողովում քվորում չի լինի։ Կարող է լինել այդպիսի բան, որովհետև Ազգային ժողովի մեծամասնությունն Արամ Հարությունյանի խմբակցության ներկայացուցիչներ են և, ըստ էության, Հանրապետականի ներկայացուցիչները կարող են բոյկոտել, չներկայանալ Ազգային ժողովի նիստին, քվորում չապահովել, կամ չքվեարկել Արամ Հարությունյանին կալանավորելու կամ նրան որպես մեղադրյալ ներգրավելու կապակցությամբ։ Ես, անկեղծ ասած, չգիտեմ միջնորդության մեջ կալանքը ներառվա՞ծ է, թե՞՝ ոչ, դա իրավապահ մարմինների խնդիրն է, բայց ես նկատի ունեմ, որ դա ոչ մի բան չի նշանակում», - ասել է Փաշինյանը։

Այդուհանդերձ նա հույս է հայտնել, որ Ազգային ժողովի բոլոր պատգամավորներն այդ հարցի քննարկման համար կներկայանան Ազգային ժողով, կգրանցվեն, համենայն դեպս իրենց խմբակցության պատգամավորները ներկա կլինեն։ «Ես հույս ունեմ, որ չեն խոչընդոտի կոռուպցիայի դեմ պայքարին և արդար քննությանը, բայց եթե նույնիսկ այդպիսի բան տեղի ունենա, մեծ հաշվով լավ չի, որ հետաձգվում է, բայց մեծ հաշվով արդեն մյուս Ազգային ժողովն այդ հարցին կանդրադառնա և այդ հարցը կլուծվի»,- ընդգծել է Նիկոլ Փաշինյանը։

Հիշեցնենք, որ ՀՀ գլխավոր դատախազությունն այսօր հաղորդագրություն է տարածել առ այն, որ 2015թ. սեպտեմբերի 11-ին պաշտոնատար անձի կողմից առանձնապես խոշոր չափերով կաշառք ստանալու դեպքի առթիվ ՀՀ հատուկ քննչական ծառայությունում ՀՀ քրեական օրենսգրքի 311-րդ հոդվածի 4-րդ մասի 2-րդ կետով հարուցված քրեական գործի նախաքննությամբ ձեռք բերված բավարար ապացույցների համակցությումբ հիմնավորվել է, որ ՀՀ Ազգային ժողովի պատգամավոր Արամ Հարությունյանը 2008թ. զբաղեցնելով ՀՀ բնապահպանության նախարարի պաշտոնը, միաժամանակ որպես «Ընդերքի օգտակար հանածոների շահագործման նպատակով ուսումնասիրության հատուկ լիցենզիաներ» տրամադրող միջգերատեսչական հանձնաժողովի նախագահ, Սյունիքի, Գեղարքունիքի, Լոռու, Կոտայքի մարզերի գունավոր մետաղների թվով 10 հանքերևակումների ուսումնասիրության և շահագործման հատուկ լիցենզիաներ տրամադրելու համար, Ս. Հ.-ից պահանջել և միջնորդավորված եղանակով ստացել է 14մլն ԱՄՆ դոլար առանձնապես խոշոր չափերով կաշառք:

Ձեռք բերված ապացույցների համակցությունը բավարար հիմք է տալիս ՀՀ Ազգային ժողովի պատգամավոր Արամ Հարությունյանին սույն գործով ներգրավելու որպես մեղադրյալ և մեղադրանք առաջադրելու առանձնապես խոշոր չափերով կաշառք ստանալու համար՝ ՀՀ քրեական օրենսգրքի 311-րդ հոդվածի 4-րդ մասի 2-րդ կետով և հանցավոր ճանապարհով ստացված եամուտների օրինականացման համար՝ 190-րդ հոդվածի 3-րդ մասի 1-ին կետով։

ՀՀ գլխավոր դատախազ Արթուր Դավթյանը միջնորդություններ է ներկայացրել ՀՀ Ազգային ժողովին, ի դեմս ՀՀ ԱԺ նախագահի՝ տալու համաձայնություն ՀՀ Ազգային ժողովի պատգամավոր Արամ Հարությունյանի նկատմամբ քրեական հետապնդում հարուցելուն, ինչպես նաև նրա նկատմամբ կալանավորումը որպես խափանման միջոց կիրառելուն:

ԱԺ նախագահ Արա Բաբլոյանն արդեն հայտարարել է, որ միջնորդություններն ստացել են։

Նշենք, որ այս գումարման ԱԺ-ն արդեն ինքնալուծարված է եւ դեկտեմբերի 9-ին տեղի են ունենալու արտահերթ խորհրդարանական ընտրություններ։

Աղբյուր` Փաստինֆո