Փաստ ինֆո

Ա.Աշոտյանը նշել է, որ այս դեպքի մասին, առանց անուններ տալու, Նիկոլ Փաշինյանը խոսել է դեռևս ամիսներ առաջ, և ոչ ոք չէր խանգարում այս իշխանություններին այդ որոշումը կայացնել մինչև ընտրարշավը։ Ներկայումս նման միջնորդության ներկայացումը, ըստ Աշոտյանի, զավեշտալի է այն առումով, որ ԱԺ այսօրվա կազմը գրեթե ամբողջությամբ քարոզարշավի մեջ է, և քիչ է հավանական, որ քվորում կապահովվի ներկայացված միջնորդությունը բավարարելու համար։

«Առավել զավեշտալի է այն, որ Արամ Հարությունյանը գալիք ընտրություններին, որպես թեկնածու՝ առաջադրված չէ. ոչ Հանրապետական, և ոչ էլ որևէ այլ ուժի ցուցակում նա չկա։ Այսինքն՝ դեկտեմբերի 24-ից նա այլևս ԱԺ պատգամավոր չի լինելու, և հետևաբար՝ կարիք էլ չի լինելու որևէ դատախազական միջնորդության կամ ԱԺ նիստի՝ այս որոշումը կյանքի կոչելու համար։ Ո՞ւմ է պետք ձեր երեք կոպեկանոց նախընտրական հակաքարոզչությունը, պարոն Փաշինյան։ Ձեզ թվում է՝ նորից կարող եք խաբե՞լ այս հասարակությանը, որի աչքերը սկսել են բացվել»,- հավելեց ՀՀԿ փոխնախագահը։

Նրա խոսքերով՝ Արամ Հարությունյանի մեղքն ապացուցելը քննչական մարմինների իրավասությունն է, և ինքը դրա մասին չի ասում, այլ տալիս է քաղաքական գնահատականներ, և այն, որ վարչապետն այս գործը 2 ամիս պահել ու հիմա է կյանքի կոչել, խոսում է այն մասին, որ այն օգտագործվում է՝ որպես հակակոռուպցիոն պայքարի հերթական դրոշակ՝ իրենց և հասարակությանը հերթական անգամ ապացուցելով, որ իշխանությունների հակակոռուպցիոն պայքարը բացառապես քաղաքական մոտիվներ ունի և բացառապես ընտրողական արդարադատության արդյունք է։

«Մեղավո՞ր է Արամ Հարությունյանը, թե՞ ոչ, կորոշի դատարանը, բայց Դուք, պարոն Փաշինյան, մեղավոր եք, որ այս ժամանակահատվածում ձեր քաղաքական թիվ 1 մրցակիցներից մեկի հանդեպ կիրառում եք նման կեղտոտ տեխնոլոգիաներ, կեղտոտ հակաքարոզչություն, կեղտոտ հնարք, և սա մարդկանց մոտ արագացնելու է վերադարձն էյֆորիայից՝ դեպի իրականության սթափ ընկալում»,- նշել է պատգամավորը։

Աղբյուր` Փաստինֆո