Փաստ ինֆո

Վերաքննիչ դատարանում ավարտվեց ՀՀ երկրորդ նախագահ Ռոբերտ Քոչարյանի պաշտպանական թիմի բողոքի ներկայացումը: Դատական նիստի ընդմիջումանն այդ մասին լրագրողներին տեղեկացրեց Քոչարյանի պաշտպաններից Արամ Օրբելյանը:

«Շարունակեցինք պաշտպանների բողոքի ներկայացման գործընթացը: Կարելի է ասել՝ ավարտվեց պաշտպանների բողոքի ներկայացումը: Հիմա կանցնենք հաջորդ փուլին: Դեռևս դատախազության դիրքորոշումը և այլ գործընթացներ չեն իրականացվել: Դիրքորոշումների ներկայացումից հետո կքննվեն և առարկությունների ներկայացումից հետո կանցնենք միջնորդությունների քննությանը», -ասաց Օրբելյանը:

Նրա խոսքով` նախորդ դատական նիստերին դատավորի ինքնաբացարկի միջնորդության հարցն էր քննարկվել, հետո ներկայացվել պաշտպանների բողոքը:

Ընդմիջումից հետո փաստաբանների բողոքի վերաբերյալ իրենց դիրքորոշումը պետք է ներկայացնեն դատախազները, ինչից հետո դատարանը կհեռանա խորհրդակցական սենյակ։ Օրբելյանի կարծիքով՝ ֆիզիկապես հնարավոր չի լինի այսօր կայացնել որոշումը:

Ա.Օրբելյանի տեղեկացմամբ՝ Ռոբերտ Քոչարյանը նիստին ներկա է եղել, հանդես է եկել հայտարարությամբ, սակայն այլ մանրամասներ չհայտնեց

«Դատական գործընթաց է, բոլոր ելույթները գործի մասին են, իհարկե, միշտ էլ հնարավոր է իրավական դիրքորոշումները դիտարկել քաղաքական, քաղաքական դիրքորոշումները՝ իրավական լույսի ներքո, բայց խոսքը հենց կոնկրետ իրավական կարծիքի մասին է»,- ասաց նա՝ նշելով, որ  Սահմանադրական դատարան դիմելու հարցը դեռևս օրակարգում է։

«Երկրում անձեռնմխելի մարդ չկա, երկրում կան ինստիտուտներ, որոնք օգտվում են անձեռնմխելիությունից, դա ԱԺ պատգամավորն է, ունի բացարձակ անձեռնմխելություն, կարող է ցանկացած կարծիք հայտնե, և երկրի նախագահն է՝ իր գործառույթներն իրականացնելիս։ Սա իշխանությունների տարանջատման կարևոր երաշխիք է։ Եթե մենք Եվրոպական դատարանի բոլոր գործերը նայենք, որտեղ խոսվում է պառլամենտական անձեռնմխելիության մասին, ուղղակիորեն նախատեսված է։ Սա նրա համար է, որ գործադիրն ու դատականը չմիջամտեն օրենսդիրին։ Նույնը վերաբերում է նաև նախագահի գործառույթներին»,- եզրափակեց նա։

Վերաքննիչ դատարանը շարունակում է ՀՀ երկրորդ նախագահ Ռոբերտ Քոչարյանի նկատմամբ ընտրված խափանման միջոց կալանավորման որոշումն անձեռնմխելիության հիմքով վերացնելու վերաբերյալ բողոքի քննությունը:

Աղբյուր` Փաստինֆո