Փաստ ինֆո

 «Իմ քայլը» դաշինքի առաջնորդ Նիկոլ Փաշինյանն այսօր Գորիսում նախընտրական քարոզարշավի շրջանակներում ընտրողների հետ հանդիպման ժամանակ անդրադարձել է արցախյան հիմնախնդրի հարցում իր ղեկավարած կառավարության քաղաքականությունը քննադատողներին եւ հայտարարել, թե որոշ մարդիկ շատ վստահ քայլերով շարժվում են դեպի պետական դավաճանություն։

«Հայաստանում կան քաղաքական ուժերի ներկայացուցիչներ, ովքեր օրումեջ ասում են, թե հեղափոխությունը դավադրություն է Արցախի դեմ եւ  մեր կառավարությունը դավադրություն է պատրաստում Արցախի դեմ և մեր կառավարությունը նենգ մտադրություններ ունի Արցախի դեմ: Անկեղծ ասած, ես անընդհատ մտածում եմ, թե ինչը կարող է դրդել այդ մարդկանց անել հայտարարություններ, որոնց սուտ լինելու մասին գիտեն առաջին հերթին իրենք: Պատկերացնում եք՝ երբ մարդիկ սուտ հայտարարություններ են անում՝ իրենք էլ իմանալով, որ սուտ հայտարարություն են անում», -Գորիսում հայտարարել է ՀՀ վարչապետի պաշտոնակատար Նիկոլ Փաշինյանը:

Անդրադառնալով ՀՅԴ Բյուրոյի ներկայացուցիչ Հրանտ Մարգարյանի հայտարարությանը, որի համաձայն, Հայաստանը վերջին ամիսների ընթացքում որևէ սպառազինություն ձեռք չի բերել՝ Ն.Փաշինյանն ասել է. «Մարդիկ սուտ հայտարարություններ են անում, թե Հայաստանը զենք չի գնում։ Ես պաշտոնապես ասում եմ, որ դրանք սխալ հայտարարություն են»։

«Ես անընդհատ մտածում եմ՝ լավ, էս մարդիկ նման հայտարարություններ ինչու են անում», -ասել է  Փաշինյանը՝ ընդգծելով, որ իր մտորումների արդյունքում որևէ տրամաբանական բացատրություն չի գտնում բացի նրանից, որ որոշ քաղաքական ուժեր հասկացել են, որ այս ընտրությունները լինելու են իրենց քաղաքական մահվան արձանագրումը։

«Խնդրում եմ, շատ ուշադիր, ժողովուրդ, սա շատ կարևոր բան է, չէի ուզում ասել, բայց պետք է ասեմ՝ իրենց պոտենցիալ, մոտալուտ քաղաքական մահը արձանագրելով, նրանք որոշել են քաղաքական սադրիչ հայտարարություններով դավադիր պատերազմի հրձիգ դառնալ՝ հույս ունենալով, որ կկարողանան հրահրել դավադիր պատերազմ և այդ համատեքստում լուծել իրենց նեղ խմբային և անձնային շահերը:

Սա շատ լուրջ վարկած է, որովհետև ես իրոք, չեմ կարողանում ուրիշ բացատրություն գտնել: Ես  կարծում եմ, որ այս ամենն արդեն դուրս է միայն զուտ քաղաքական հարթակներում քննարկելու տրամաբանությունից: Ես կարծում եմ, որ ահա իմ ասած վարկածի ստուգմամբ և այդ հայտարարություններով այլևս պետք է զբաղվեն նաև Ազգային անվտանգության ծառայությունը և ռազմական հակահետախուզությունը, որովհետև ոմանք, որոշ մարդիկ շատ վստահ քայլերով շարժվում են դեպի պետական դավաճանություն: Ես չեմ վախենում այս հայտարարությունը անել»,- ասել է Նիկոլ Փաշինյանը՝ ընդգծելով, որ այսօրվա կառավարությունը եւ Հայաստանի ժողովուրդը ունեն «բավարար լծակներ, որպեսզի արմատախիլ անեն մեր զինված ուժերի թիկունքում քայքայիչ գործողություններ անելու փորձեր անող որոշ ուժերի»:

Աղբյուր` Փաստինֆո