Փաստ ինֆո

«Երևանի թիվ 1» տուն-ինտերնատի նախկին տնօրեն Վահան Զուրաբյանը քաղաքացիական հայց է ներկայացրել ընդդեմ Աշխատանքի և սոցիալական հարցերի նախկին նախարարության՝ ի դեմս նախկին նախարար Մանե Թանդիլյանի։

Նախարարության երկարամյա նախկին պաշտոնյան դատարանից պահանջում է անվավեր ճանաչել իրեն աշխատանքից ազատելու մասին Թանդիլյանի որոշումը, վերականգնել աշխատանքի և վճարել հարկադիր պարապուրդը։

Երևան քաղաքի դատարանը վարույթ է ընդունել քաղաքացիական հայցը և դատական ինստի օր նշանակել դեկտեմբերի 11-ին՝ խորհրդարանական արտահերթ ընտրություններից հետո։

Վահան Զուրաբյանը Aysor.am-ի թղթակցի հետ զրույցում նախկին նախարարի հրամանը անօրինական ու անհիմն որակեց։ Նա պատմեց, որ ինքը անաշխատունակության (բյուլետեն) մեջ է եղել և հոկտեմբերի 8-ին ներկայանալով աշխատանքի՝ նոր միայն տեղեկացել է, որ նախարարի հրամանով ազատված է աշխատանքից։

«Ես հիվանդ էի և հոկտեմբերի 8-ին բյուլետենից վերադառնում եմ աշխատանքի ու պարզում, որ հեռացված եմ։ Նախարարի հրամանով ես աշխատանքից հեռացված եմ եղել վստահությունը կորցնելու հիմքով։ Շատ կարճ ժամանակ ենք միասին աշխատել, խնդիրներ իմ առջև չի դրվել ու միանգամից հրաման եմ ստացել, որ աշխատանքից ազատված եմ», - մեզ հետ զրույցում ասաց Զուրաբյանը։

Նախկին պաշտոնյան ասաց, որ Աշխատանքային օրենսգիրքը սահմանում է վստահությունը կորցնելու հիմքերը, որոնք են՝ պետությանը խոշոր չափի նյութական վնաս պատճառելը, պետական գաղտնիք հրապարակելը։ Զուրաբյանն ասաց, որ այդ հիմքերից որևէ մեկը իր հետ կապ չունի, որևէ խախտում իր երկարամյա աշխատանքի ընթացքում թույլ չի տվել։

Հարցին, թե փորձե՞լ է անձամբ Թանդիլյանի հետ շփվել, հասկանալ՝ ինչու է այդ քայլին գնացել, Զուրաբյանը պատասխանեց, որ բազմաթիվ փորձեր կատարել է, բայց ապարդյուն։

«Բազմաթիվ անգամ փորձել եմ նախարարի հետ հանդիպել, որպեսզի ավելի շատ հասկանամ մոտեցումը, աշխատանքային ինչ մոտեցումներ պետք է ցուցաբերել, բայց ոչ մի անգամ ընդունելության չեմ արժանացել», - հավելեց Զուրաբյանը։

Նա ենթադրում է, որ Մանե Թանդիլյանի քայլը զուտ անձնական խնդիրներով է պայմանավորված եղել։ «Եթե մարդու հետ չես աշխատում, նրա առաջ խնդիրներ չես դնում, չես հակսանում՝ այդ խնդիրները լուծե՞լ է, թե՞ ոչ, հետևաբար ես կարող եմ ենթադրել, որ անձնական խնդիրներ է ունեցել նախարարը ինձ աշխատանքից հեռացնելու համար», - ասաց Վահան Զուրաբյանը։

Բացի այդ, նրա խոսքով, ինքը երկար տարիներ աշխատում է նախարարությունում, վարչությունների գրեթե բոլոր աշխատակիցների հետ շփվել է, որևէ մեկը չէր կարող դժգոհել ու զեկուցագիր ներկայացնել իր աշխատանքի մասին։ Նախկին պաշտոնյայի պնդմամբ, այդ որոշումը կայացրել են Թանդիլյանն ու իր առաջին տեղակալը՝ այժմ նախարարի պաշտոնակատար Արսեն Մանուկյանը։

Դիտարկմանը, թե ստացվում է՝ Աշխատանքային օրենսգիրքը մշակող ու առաջնային կատարող մարմնի ղեկավարը՝ աշխատանքի և սոցիալական հարցերի նախարարը առաջինն ինքը չի կատարում օրենքը, Վահան Զուրաբյանը արձագանքեց. «Ստացվում է այդպես։ Դրան վատագույն գնահատականը կարող եմ տալ, որովհետև մարմինը, որը մշակում է աշխատանքային օրենսգիրքը, ներկայացնում փոփոխություններ, կատարում է խախտում։ Ես պնդում եմ, որ նրա հրամանը ոչ օրինաչափ է և դրա մեջ իրավական որևէ կետ չկա։ Ցավալի է, որ օրենսդրությունը մշակող մարմինը թույլ է տալիս խախտում»։

Աղբյուր` Փաստինֆո