Փաստ ինֆո

Գեղարքունիքի մարզպետարանի նիստերի դահլիճում Գեղարքունիքի մարզի թիվ 8 ընտրատարածքում ռեյտինգային ընտրակարգով առաջադրված ՀՀ ԱԺ պատգամավորի թեկնածուներին հանդիպեց ՀՀ ոստիկանության պետ Վալերիյ Օսիպյանը:

Հանդիպմանը մասնակցեցին ԿԸՀ կողմից գրանցված բոլոր դաշինքների եւ կուսակցությունների կողմից Գեղարքունիքի մարզի թիվ 8 ընտրատարածքում ռեյտինգային ընտրակարգով առաջադրված թեկնածուները եւ ՀՀ ոստիկանության Գեղարքունիքի մարզային վարչության եւ բաժինների պետերն ու աշխատակիցները: ՀՀ ոստիկանության պետը հորդորեց թեկնածուներին՝ քարոզարշավի եւ ընտրության օրերին զերծ մնալ հակաօրինական որեւէ գործողությունից եւ ամեն ինչ կազմակերպել միայն օրենքի շրջանակներում, որպեսզի դեկտեմբերի 9-ին նոր Հայաստանում անցկացվեն բացառապես ազատ, արդար եւ թափանցիկ ընտրություններ:

«Ոստիկանությունն ամենայն ուշադրությամբ հետեւում է իրադարձությունների զարգացմանը: Որեւէ վարչական ռեսուրսի չարաշահում, որեւէ ընտրակաշառք, ընտրակեղծիք, հակաօրինական գործողություն մեր կողմից արժանանալու է համարժեք արձագանքի: Մենք համատեղ ուժերով պետք է ջանքեր գործադրենք, որպեսզի դեկտեմբերի 9-ին ունենանք ավելի արդար, ազատ, մաքուր ու թափանցիկ ընտրություններ: Քարոզարշավի ողջ ընթացքում մենք ապահովելու ենք քարոզչության հավասար պայմաններ բոլորի համար, ինչպես նաեւ՝ բոլոր թեկնածուների, վստահելի անձանց անվտանգությունը եւ հասարակական կարգի պահպանությունը: Սեպտեմբերի 23-ին մայրաքաղաք Երեւանում եւ հոկտեմբերի 21-ին մարզերում կայացած ՏԻՄ ընտրություններում մենք ապացուցեցինք, որ ի զորու ենք մաքուր, արդար ու թափանցիկ ընտրությունների ընթացք ապահովելու, այն էլ՝ մեր իսկ ուժերով:

Բայց ցանկալի է, որ այս համապետական կարեւորագույն ընտրություններում մենք ունենանք նաեւ ձեր աջակցությունը, քանի որ ձեր հետ համագործակցությունը, համոզված եմ, կհանգեցնի ավելի դրական ու նկատելի արդյունքների»,- թեկնածուներին դիմեց Վալերիյ Օսիպյանը: ՀՀ ոստիկանության պետը հորդորեց հանդիպման մասնակիցներին՝ անհաշտ վերաբերմունք դրսեւորել հատկապես ընտրակաշառքի կամ ընտրակեղծիքների դեպքում: «Ընտրակաշառքը լինում է փողով, բնամթերքով, կոմունալ վճարումներով, նվիրատվություններով, խոստումներով, այլ ձեւերով, որոնց մենք հետեւում ենք ուշիուշով: Ընտրակաշառք բաժանողները, վերցնողները կամ ընտրակեղծիքով զբաղվողները ոչ մի կերպ չեն խուսափի օրենքի պատժից: Ոչ ոք թող չմտածի ոչ կաշառք տալու, ոչ էլ՝ վերցնելու մասին:

Միաժամանակ, որեւէ մեկը չի կարող մյուսին ստիպել՝ իր կամ իր ուզած թեկնածուի օգտին քվեարկելու, մարդկանց խմբերով ընտրատեղամասեր բերելու: Ընտրատեղամասից 50 մետր շառավղով ոչ մի մեքենա չի կանգնելու: Ընտրատեղամաս մեքենայով կարող են գալ միայն նրանք, ովքեր զրկված են շարժվելու հնարավորությունից: Հարգելի թեկնածուներ, հարգելի քաղաքացիներ, ընտրությունների հետ կապված ցանկացած հակաօրինական գործողություն նկատելիս անմիջապես ահազանգեք ոստիկանություն:

Ձեր աջակցությունը մեզ համար անչափ կարեւոր է, որպեսզի մենք դեկտեմբերի 9-ին Հայաստանում ապահովենք ամենամաքուր, արդար, ազատ ու թափանցիկ ընտրությունները, ինչը էապես կավելացնի մեր երկրի միջազգային կշիռն ու հեղինակությունը»,- խոսքը եզրափակեց ՀՀ ոստիկանության պետ Վալերիյ Օսիպյանը:

Աղբյուր` Փաստինֆո