Փաստ ինֆո

Ինչպես նախորդ իշխանությունը չէր կարողանում արտաքին քաղաքականությամբ սպասարկել հայ ժողովրդի շահերը, այնպես էլ նոր իշխանությունը, չունենալով փորձառություն, չի կարողանում դա իրականացնել:

Այս մասին այսօր նախընտրական ծրագրի ներկայացման ժամանակ հայտարարեց «Օրինաց երկիր» կուսակցության նախագահ Արթուր Բաղդասարյանը: 

Բաղդասարյանի բնորոշմամբ՝ յոթ ամիս է անցել, բայց տնտեսական զարգացման հստակ ծրագիր չկա. «Տեսնում ենք ներդրումների նվազում, ավելին՝ բացակայություն: Չկան քայլեր, որոնք ՀՀ-ում կստեղծեին աշխատատեղեր, մինչդեռ հեղափոխության նպատակն է՝ բարեկեցություն, աշխատավարձերի եւ թոշակների բարձրացում, հավասար հնարավորություններ, աշխատատեղեր, տարածաշրջանային խնդիրների լուծում: Մենք այդ հարցերի լուծման տարբերակները չենք տեսնում»:

Այդ պատճառով, ինչպես Բաղդասարյանը նշեց, իրենք առաջարկում են երկրի զարգացման սեփական տեսլականը՝ ամփոփված հիսուն արդյունավետ քայլերում: Հավելենք, որ ՕԵԿ նախընտրական ծրագրի տպագիր տարբերակը կհրապարակվի երկուշաբթի, երբ կսկսվի նախընտրական քարոզարշավը:

«Շատ լավ է, որ այլեւս փող եւ ընտրակաշառք չկա, վարչական ճնշումներ չկան, այսինքն՝ փորձի եւ խելքի պայքար է: Իսկ ՕԵԿ-ն ունի բավարար խելք եւ փորձառություն»,-համոզմունք հայտնեց Արթուր Բաղդասարյանը:

Աղբյուր` Փաստինֆո