Փաստ ինֆո

Վարչապետի պաշտոնակատար Նիկոլ Փաշինյանի որոշմամբ կառավարության նիստի օրակարգից հանվեց «Ճանապարհային երթևեկության անվտանգության ապահովման մասին» Հայաստանի Հանրապետության օրենքում լրացվում կատարելու մասին» օրենքի նախագիծը:

Ոստիկանության պետ Վալերիյ Օսիպյանը նշեց, որ դրանով  առաջարկվում է նախատեսել, որպեսզի Ճանապարհային երթևեկությունը կարգավորող ծառայողի կողմից օրենքով սահմանված կարգով տրանսպորտային միջոցի կանգնեցնելուց հետո տրանսպորտային միջոցի խցիկից կամ սրահից դուրս չգալու, ինչպես նաև ոստիկանության ծառայողի պահանջով տրանսպորտային միջոցի խցիկում նստելու պարտականությունը:

Վալերիյ Օսիպյանը նշեց, որ լրացվող պարտականությունը նախատեսվում է ինչպես հասարակական կարգի, այնպես էլ վարորդ-ոստիկան շփման ընթացքում կոռուպցիոն ռիսկերը նվազագույնին հասնելու նպատակով:

Հարցի վերաբերյալ արձագանքեց ՀՀ վարչապետի պաշտոնակատար Նիկոլ Փաշինյանը և հարցրեց. «Ճի՞շտ հասկացանք, որ երբ ՃՈ աշխատակիցը կանգնեցնում է, վարորդը պետք է մնա մեքենայի մեջ նստած»:

«Այո, պետք է մնա, սակայն եթե իր ցանկությամբ իջնում է՝ ելնելով ստեղծված իրավիճակից, ոստիկանը կարող է ստիպել, որպեսզի նա վերադառնա սրահ: Չվերադառալու դեպքում վրա է հասնում ոստիկանության աշխատակցի օրինական պահանջը չկատարելը: Ոստիկանը կմոտենա, կներկայացնի խախտումը»,- ասաց նա՝ նշելով, որ հնարավոր  է նաև իրավիճակ, երբ վարորդը չվերադառնա սրահ:

«Ի՞նչն է փոխվում: Հիմա էլ այդպես է»,- նկատեց Փաշինյանը: Օսիպյանն էլ արձագանքեց, որ մինչ այս չի եղել ոստիկանի միջամտության հարցը: Նա ասաց նաև, որ հնարավոր է լինեն դեպքեր, երբ անհրաժեշտություն լինի, որ վարորդը դուրս գա, օրինակ, երբ անհրաժեշտություն լինի բեռնախցիկը բացել և այլն: Համաձայն եմ, որ ընդունված է պրակտիկայում, երբ վարորդի իջնելը կապվում է կոռուպցիոն գործընթացների հետ»,-ասաց նա:

Երկար քննարկումից հետո, Նիկոլ Փաշինյանը առաջարկեց հարցը հանել օրակարգից, քննարկել, սոցիալական գովազդ պատրաստել, հասկանալ մարդկանց արձագանքը, ապա նոր ներկայացնել:

Աղբյուր` Փաստինֆո