Փաստ ինֆո

ԱԺ Դաշնակցություն խմբակցության ղեկավար Արմեն Ռուստամյանի կարծիքով կա երկու պատճառ, թե ինչո՞ւ հապշտապ որոշվեց խորհրդարանական արտահերթ ընտրություններն անցկացնել հենց դեկտեմբերին և ոչ թե 2019 թվականի մայիս-հունիս ամիսներին, ավելի ուշ նախատեսված էր։

«Ես երկու պարզ պատճառ եմ տեսնում. առաջինը՝ ինչքան երկար է տևում ժամանակը, այնքան ավելի է շատանում գործող իշխանությունների նկատմամբ քննադատությունը, որովհետև մարդկանց ակնկալիքները շատ մեծ են, հույսն էլ, իհարկե, բավարար է, որպեսզի այդ ակնկալիքները հավասարակշռի։ Բայց գալիս է ժամանակը, երբ այդ հավասարակշռությունը խախտվում է. ակնկալիքները մնում են, հույսը քչանում է։ Հնարավորինս արագ է պետք կատարել, որ այդ հույսը մարած չլինի», - այսօր լրագրողների հետ ճեպազրույցում հայտարարեց դաշնակցական պատգամավորը։

Երկրորդ պատճառը, ըստ նրա, կապված է արտաքին քաղաքականության հետ։ «Ես չեմ բացառում արտաքին քաղաքականության հետ կապված խնդիրները, որի առաջին նշանը տվեց պարոն Բոլթոնը, երբ հայտարարեց, որ Ղարաբաղի հարցը պետք է լուծվի այն ժամանակ, երբ իշխանություններն ունեն ամենամեծ վստահությունը։ Այդ վստահությունը պետք է օգտագործվի հանուն նրա, որ գնանք կոմպրոմիսների Ղարաբաղի հարցում։ Չեմ բացառում, որ մոտ ապագայում ականատեսը լինենք հակամարտության լուծման նոր առաջարկների, որոնք կդրվեն սեղանին։ Նորից սա ինձ մոտ դեժավյու է հիշեցնում ու աչքիս առաջ գալիս են 90-ականները. այն ժամանակ էլ 93 տոկոսով ունեցանք ընտրված նախագահ և առաջին քայլը որ կատարվեց, Ղարաբաղի ուղղությամբ շեղումն էր էն տրամաբանությունից, որով իրենք եկել էին իշխանության։ Այսինքն՝ եկել էին միացման կարգախոսով, բայց հետո բերվեց առաջարկ, որը չընդունվեց հենց իր թիմի կողմից։ Այն ժամանակ թիմը ձևավորվել էր հենց Ղարաբաղի հարցի վրա, բայց այս թիմը այդ հարցի հետ կապ չունի և իմ հիմնական մտահոգությունը հենց դա է՝ ո՞վ է ներսից պաշտպանելու Ղարաբաղի հարցը»,- ասաց Ռուստամյանկ։

Նրա կարծիքով՝ Բոլթոնի հայտարարություններին պետք է լուրջ վերաբերվել, քանի որ գնահատականը ճիշտ է՝ ղարաբաղյան հակամարտության հարցը եթե պետք է լուծվի, ապա պետք է լուծի այն իշխանությունը, որն ունի բարձր վստահություն։

«Հարցը պետք է լուծի այն իշխանությունը, որի խոսքն այսօր հալած յուղի պես ընդունում է ժողովուրդը։ Այս վիճակը արտաքին ուժերին ձեռք է տալիս, նրանց կարևոր չէ՝ մեր ժողովուրդը աղքա՞տ է ապրում, թե սոված է։ Նրանց խնդիրները աշխարհաքաղաքական են։ Այդ խաղի մեջ Հայաստանը կարող է դառնալ մանրադրամ», - հավելեց Ռուստամյանը։

ԱԺ Դաշնակցություն խմբակցության ղեկավարն անդրադարձավ նաեւ Գեղարքունիքի մարզ աշխատանքային ժամին կատարած այցին, ինչի ժամանակ, ըստ ՀՀԿ-ի, վարչապետի պաշտոնակատար Նիկոլ Փաշինյանի կողմից իրականացվել է քարոզչություն այն դեպքում, երբ նախընտրական քարոզարշավը Հայաստանում դեռ չի մեկնարկել։

«Այո՛, այդ այցելության ընթացքում եղել են, հնչել են արտահայտություններ, որոնք քարոզ են նշանակում, մասնավորապես, այն պահը, որ ձայն պետք է տաք մեզ, որպեսզի մենք շարունակենք այն, ինչ սկսել ենք, ավարտին հասցնենք Ազգային ժողովի ձևավորման գործընթացը։ Ի՞նչ է դա նշանակում, նշանակում է, որ ձայն պետք է տան Նիկոլ Փաշինյանի ուժին։ Էլ քարոզչությունը ո՞նց է լինում», - այսօր լրագրողների հետ ճեպազրույցում հայտարարեց Ռուստամյանը։

Նրա կարծիքով՝ Կենտրոնական ընտրական հանձնաժողովը պարտավոր է արձագանքել այդ ամենին։

Աղբյուր` Փաստինֆո