Փաստ ինֆո

Կանխատեսելի էր, որ ՀԱՊԿ-ի գլխավոր քարտուղարի պաշտոնը կորցնելու ենք։ Այսօր լրագրողների հետ ճեպազրույցում ասել է ՀՀԿ խմբակցության ղեկավար Վահրամ Բաղդասարյանը։

Ըստ նրա՝ Յուրի Խաչատուրովի նկատմամբ քրեական հետապնդում հարուցելու, կալանվորելու անհրաժեշտության մասին նախապես պետք է տեղյակ պահվեին ՀԱՊԿ անդամ երկրները։

«Դա չի կատարվել, հարաբերությունների լարումն ու սրումն այդտեղից առաջացավ ու կանխատեսելի էր, որ մենք կորցնելու ենք այդ տեղը», - ասաց նա:

Անդրադառնալով Հայաստան-Բելոռուս հարաբերություններում նկատվող լարվածությանը՝ Վ.Բաղդասարյանը նշել է, որ նման հռետորաբանությունն ընդունելի չէ, առավել ևս դաշնակից և բարեկամ երկրների միջև:

«ՀԱՊԿ-ը մի մեծ ընտանիք է: Ամբողջ աշխարհն է հետևում դրան ու ինձ թվում է՝ դա ընդունելի հռետորաբանություն չի», - ասաց նա:

Հիշեցնենք, որ ՀՀ վարչապետի պաշտոնակատար Նիկոլ Փաշինյանն ասել էր, որ Բելառուսի և Ղազախստանի նախագահներից պարզաբանումներ է պահանջելու Բելառուսի նախագահի և այդ երկրում Ադրբեջանի դեսպանի հանդիպման մասով:

Նիկոլ Փաշինյանի այդ հայտարարությանն արձագանքել էր Բելառուսի ԱԳՆ խոսնակը՝ ասելով, թե Հայաստանի Հանրապետության վարչապետի պաշտոնակատարն իրեն, կարծես, դրել է միջազգային դատախազի տեղ, որը կարող է պատժել ու ներել:

Աղբյուր` Փաստինֆո