Փաստ ինֆո

«Նոր նախաձեռնությունը, որը Կառավարությունը պատրաստվում է ներկայացնել ուղղակիորեն հարվածելու է անապահով խավի գրպանին»,- այսօր ֆեյսբուքյան իր էջում ուղիղ եթեր մտնելու միջոցով ՀՀ քաղաքացիներին դիմելով՝ հայտարարեց ԱԺ փոխնախագահ, ԱԺ ԵԽԽՎ պատվիրակության ղեկավար և ՀՀԿ համամասնական ցուցակի 2-րդ համարը ներկայացնող Արփինե Հովհաննիսյանը։

Հիշեցնենք, որ խոսքը ՊԵԿ-ի՝ շրջանառության մեջ դրված այն նոր գաղափարի մասին է, ըստ որի՝ 2020թ-ից  եկամտային հարկի պոտենցիալ վճարող են դառնալու 18-65 տարեկան ՀՀ բոլոր քաղաքացիները: Դրա առաջին քայլը պետք է լինի քաղաքացու կողմից սեփական եկամուտները պարտադիր հայտարարագրումը, համաձայն որի՝ կորոշվի՝ նա ունի՞ հարկման ենթակա եկամուտ, թե՞ ոչ:

Նախաձեռնությունն արդեն իսկ արժանացել է հանրության կոշտ հակազդեցությանն ու դժգոհությանը։

Ըստ Արփինե Հովհաննիսյանի՝ դա նշանակում է, որ, օրինակ, եթե գյուղացին վաճառում է իր մթերքը, այսինքն՝ ինքնազբաղված անձինք, պետք է վաճառքից գոյացած իրենց եկամուտը հայտարարագրեն։ Կամ, օրինակ, արտագնա աշխատանքի մեկնած մեր քաղաքացիները, որոնք իրենց ընտանիքը պահելու համար ուղարկում են որոշակի գումար, այդ գումարը ստանալիս նրանց ընտանիքի անդամները պետք է հայտարարագրեն իրենց եկամուտը։

«Այս ամենով ամեն ինչ սկսվում է և ոչ ավարտվում։ Ըստ նախագծի՝ հայտարարագրելուց հետո այդ եկամտի 23 տոկոսը պետք է ուղղվի պետական բյուջե։ Սա նշանակում է, որ եթե ձեզ 100 դոլար գումար են ուղարկել, դրա 23 տոկոսը պետք է գնա պետական բյուջե։ Սա անթույլատրելի է։ Այն եղանակով, որով ներկայացվել է այս նախագիծը, ուղղակի չի կարելի թույլ տալ, որ այն կյանքի կոչվի և իրականություն դառնա»,- նախագիծը մեկնաբանել է ԱԺ փոխնախագահը։

Նա հավելել է նաև, որ երկար տարիներ ծանոթ լինելով հակակոռուպցիոն պայքարի գործիքներին և քաջածանոթ լինելով նաև այն երկրների փորձին, որոնք անցել են համատարած հայտարարագրման, ինքը կարող է միանշանակ պնդել, որ այս ձևաչափով, այս գործիքակազմով նախաձեռնությունը Հայաստանի Հանրապետությունում կյանքի կոչվել չի կարող։

«Ես իմ իրավասությունների շրջանակներում անելու եմ ամեն ինչ, որպեսզի այս նախագիծն իրականություն չդառնա»,-եզրափակել է Ա. Հովհաննիսյանը։

Աղբյուր` Փաստինֆո