Փաստ ինֆո

ՊԵԿ հրապարակումներն անհիմն են, ամռան գործունեությունը համեմատել են ձմռան գործունեության հետ։ Այսօր տեղի ունեցած մամուլի ասուլիսում հայտարարել է Գազպրոմ Արմենիա» ՓԲԸ վարչության նախագահ-գլխավոր տնօրեն Հրանտ Թադևոսյանը՝ անդրադառնալով «Գազպրոմ Արմենիայում» չարաշահումների հայտնաբերման մասին ՊԵԿ տարածած հաղորդագրությանը։

Նման համեմատություը համարելով ոչ տեղին՝ բանախոսը նկատել է. «Ձմռան ամիսներին կորուստներն անհամեմատ բարձր են, քան ամռան ամիսներին և դա այսպես է ոչ միայն 2018 թվականի համար»։ Ըստ նրա՝ ձմռանը լրացուցիչ կորուստներ են առաջանում և կախված նրանից ցրտաշունչ է ձմեռը, թե ոչ, կորուստների չափերը տարբեր են, ինչը նորմալ է։

««Գազպրոմ Արմենիան» ՀՀ գազաէներգետիկ համակարգի խոշոր ներդրողներից է, եթե ոչ՝ ամենախոշորը։ 2002-2018 թթ. ՓԲԸ-ն 950 մլն դրամի համարժեք կապիտալ ներդրումներ է իրականացրել», - ասաց Թադևոսյանը՝ ընդգծելով, որ ՓԲԸ-ն ոչ միայն չի ստացել ոչ մի լումա դիվիդենտ, այլ նաև 2017 թ-ի իր իսկ նախաձեռնությամբ նվազեցրել է ՀՀ գազասպառողներին մատակարվող բնական գազի սակագինը։

Նրա խոսքով՝ 2017 թ-ի հունվարի 1-ից առ այսօր «Գազպրոմ Արմենիան» տարեկան կտվածքով 13.4 մլրդ դրամի վնաս է կրել։

Թադևոսյանը հայտարարեց, որ եթե ՊԵԿ-ը կարողանա հիմնավորել իր հրապարակումները գազի կորուստի մասին, ապա իրենք պատրաստ են վերականգնել շեղումները:

«Եթե ՊԵԿ աշխատակցիները ուսումնասիրման արդյունքում հիմնավորվեն, որ 714 հազար բաժանորդները և շուրջ 375 ավոտգազալիցքավորման ճնշումային լիցաքվորման ժամանակ անցյալ տարի ինչ-որ մեկը բնական գազի ծավալների սպառում է թաքցրել, որի դեմ մենք պայքարել ենք, ապա «Գազպրոմ Արմենիան» շնորհակալություն կհայտնի ՊԵԿ-ին և օրենքի շրջանակներում կգանձի ամբողջ գազի գումարը և կկատարի հարկային վճարումներ իրացված գազի ծավալների մասով», - ասաց Թադևոսյանը։

Ըստ նրա՝ սպառման ծավալների ավելացումը պետք է դրական գնահատվեր եւ ոչ թե մեղադրանքներ հղվեր «Գազպրոմ Արմենիայիա» նախկինում ծավալները թաքցնելու համար,երբ վերջինս ինքն է առաջնային շահագրգռված անձը, որ իր արտադրանքի սպառման դիմաց կատարվեն անհրաժեշտ վճարումները։

Նա դժվարացավ ասել, թե ում է ձեռնտու չճշտված տեղեկությունների տարածումը եւ ինչ նպատակ էր հետապնդում, սակայն հայտարարեց, որ ՊԵԿ-ի անհիմն հրապարակումը վտանգի տակ է տրել «Գազպրոմ Արմենիայի» բարի համբավը։

«2016 թվականին Գազպրոմի 254 մլն դոլարի վարկերը 2018 թվականի ավարտին հասցվել է 128 մլնի, իսկ այս օրերին պետք է պայմանագիր կնքեինք խոշոր ռուսական բանկի հետ՝ 6,5 տոկոսով մոտ 150 մլն դոլարի վարկ վերցնելու պայմանով։ Ակնկալում էինք տնտեսել տարեկան 2-4 մլն դոլար, սակայն ՊԵԿ հայտարարությունից հետո, որը նաև տարածվել է ռուսական մամուլում, մենք ստացանք լուրջ անհանգստություն, ահազանգ այդ բանկից, որի հետ ավարտում էինք բանակցությունները: Գործարքի իրականացումը դրվում է լուրջ կասկածի տակ», - ընդգծեց Թադևոսյանը։

Հիշեցնենք ՊԵԿ-ը հայտարարություն էր տարածել, որ հարկային համալիր ստուգման ընթացքում պարզվել է, որ «Գազպրոմ Արմենիա» ՓԲԸ-ն 2016 և 2017 թվականների ընթացքում հարկային մարմին ներկայացված ԱԱՀ-ի և շահութահարկի հաշվարկներում ներառել է ակնհայտ կեղծ տվյալներ, ինչի արդյունքում մի քանի միլիարդ դրամի չափով պակաս է հաշվարկել հարկային պարտավորությունները:

Աղբյուր` Փաստինֆո