Փաստ ինֆո

Վերջին օրերին Շուշիի առանձնակի գումարտակի հրամանատար, «Սասնա ծռեր» կուսակցության ստեղծման նախաձեռնողներից Ժիրայր Սեֆիլյանի ՀՀ քաղաքացիություն ստանալու մասին իրարամերժ տեղեկություններ տարածվեցին: Նախ հայտարարվեց, թե Սեֆիլյանին մերժել են շնորհել ՀՀ քաղաքացիություն, հետո էլ տարածվեց, թե արդեն շնորհվել է:

Aysor.am-ի թղթակցի հետ զրույցում «Սասնա ծռեր» կուսակցության մամուլի քարտուղար Վահագն Ավագյանը հստակեցրեց, որ մերժվել է, մասնավորապես, Սեֆիլյանին հետին թվով քաղաքացիություն ստանալու դիմումը, որը ՀՀ պատկան մարմիններին ուղղվել էր և Ժիրայր Սեֆիլյանի, և մի շարք մտավորականների կողմից:

«Մերժման մեջ նշվում էր, որ հետին թվով քաղաքացիություն ստանալ հնարավոր չէ և դրա համար պետք է դիմել դատարան»,- ներկայացրեց մամուլի քարտուղարը:

Սակայն, նրա խոսքով, ընթացիկ ամսաթվով ՀՀ քաղաքացիություն ստանալու հարցում Սեֆիլյանը խոչընդոտների չի հանդիպել:

«Այդ դիմումին դեռ վերջնական պատասխան չենք ստացել, բայց օրերս արդարադատության նախարարի պաշտոնակատար Արտակ Զեյնալյանը հայտարարեց, որ իրենց նախարարությունը դրական է պատասխանել Սեֆիլյանին քաղաքացիություն շնորհելու առաջարկությանը», - ներկայացրեց Վահագն Ավագյանը:

Հիշեցնենք, Զեյնալյանն այդ հայտարարությունն արեց նոյեմբերի 10-ին՝ «Մենք» դաշինքի ստեղծման մասին հուշագրի ստորագրման արարողության ժամանակ՝ պատասխանելով լրագրողների հարցերին:

Մանրամասները՝ սկզբնաղբյուր-կայքում

Աղբյուր` Փաստինֆո