Փաստ ինֆո

21 տարի անց Արթուր Մեսչյանը խոսել է Երևանի գլխավոր ճարտարապետի պաշտոնից 1997 թվականին հրաժարական ներկայացնելու պատճառների մասին։

«Ես ինչո՞ւ դիմումը գրեցի ու դուրս եկա: Նախագահի «ախրանայի պետը» կյանքս կերավ բառի բուն իմաստով: Իմ կաբինետից դուրս չէր գալիս: Ասում էր՝ պիտի տաս, ասում էի՝ յա՞, իսկականի՞ց, ինչի՞ պիտի տամ, չեմ տալիս: Նա գնում բողոքում էր բոլոր ատյաններին, որտեղից ինձ զանգ էին տալիս, թե պարոն Մեսչյան, դուք գիտե՞ք՝ ում եք ասել ոչ: Ասեցի՝ ով ուզում է լինի, ի՞նչ տարբերություն, իմ գլխին Աստվածն ու իմ քաղաքն են», - այսօր տեղի ունեցած մամուլի ասուլիսում պատմեց Երևանի գլխավոր ճարտարապետ Արթուր Մեսչյանը։ Հիշեցնենք, որ նշված պաշտոնը նա զբաղեցրել է նաեւ 1997 թվականին, երբ երկրի նախագահը Լևոն Տեր-Պետրոսյանն էր։

Նրա խոսքերով՝ մինչեւ այսօր գլխավոր ճարտարապետերը 100 տոկոսով կախված էին քաղաքապետի քաղաքականությունից։

«Եթե քաղաքապետն ասում էր՝ էսինչ տեղում էսինչ տղուն հողահատկացում արեք, ինքն այդտեղ շենք է կառուցելու, ապա այդտեղ գլխավոր ճարտարապետն անելիք չուներ: Այն իրավասությունները, որը դուք վերագրում եք նախկին գլխավոր ճարտարապետ Նարեկ Սարգսյանին, այդքան չէր: Ուղղակի հիշեք, թե ինչ իշխանությունների և որ քաղաքապետերի ժամանակ է ինքն աշխատել: Այն ժամանակ ամեն ինչ լուծվում էր հեռախոսով», - նշեց բանախոսը:

Ավելին՝ նա ձեռնպահ մնաց Նարեկ Սարգսյանի հասցեին քննադատական խոսքեր հնչեցնելուց։

«Մի հետաքրքիր բան ասեմ. հաճախ եմ լսում, որ բոլորը բողոքում են Հյուսիսային պողոտայից, բայց այդ բողոքողների 90 տոկոսը երեկոյան քայլում է այդ փողոցում: Եկեք ազնիվ լինենք՝ Հյուսիսային պողոտան այսօր դարձել է Երևանի ամենասիրված վայրերից մեկը: Այնինչ, Նարեկ Սարգսյանի դեմ առաջին մեծ լարվածությունը սկսվել է այս պողոտայի կառուցումից: Հանրության բողոքը հասկանալի կլիներ, եթե հիմա այդ փողոցում ոչ ոք չքայլեր », - նկատեց Արթուր Մեսչյանը:

Աղբյուր` Փաստինֆո