Փաստ ինֆո

ՀՀ արդարադատության նախարարի առաջին տեղակալ Արթուր Հովհաննիսյանն այսօր ընդունել է Հայաստանում գործող մեկ տասնյակը գերազանցող վարկային կազմակերպությունների ներկայացուցիչների: Այս մասին հայտնում է ԱՆ տեղեկատվության և հասարակայնության և հետ կապերի վարչությունը:

Հանդիպմանը մասնակցել են նաև ՀՀ ԱՆ «Օրենսդրության զարգացման և իրավական հետազոտությունների կենտրոն» հիմնադրամի տնօրեն Տիգրան Մարկոսյանը, Կենտրոնական բանկի ներկայացուցիչներն ու Հիմնադրամի փորձագետները:

Արթուր Հովհաննիսյանը ողջունել է ներկաներին, շնորհակալություն հայտնել վարկային կազմակերպությունների ներկայացուցիչներին հանդիպումը նախաձեռնելու համար և անդրադարձել տարեսկզբին ուժի մեջ մտած «ՀՀ քաղաքացիական օրենսգրքում փոփոխություններ և լրացումներ կատարելու մասին» օրենքին, որով առաջին անգամ սահմանափակվեց տույժերի և տուգանքների առավելագույն չափը:

Նախարարի առաջին տեղակալը տեղեկացրել է, որ օրենքի ընդունումից հետո դրա մի շարք դրույթների պարզաբանման և միասնական պրակտիկա կիրառելու նպատակով հանդիպում է եղել նաև առևտրային բանկերի ներկայացուցիչների հետ, որից հետո օրենքի կիրարկման հետ կապված որևէ մտահոգության մասին չի բարձրաձայնվել: Արթուր Հովհաննիսյանը ներկաներին բաց քննարկման կոչ է արել:

Վարկային կազմակերպությունների ներկայացուցիչների հիմնական հարցերը վերաբերել են տուժանքի առավելագույն չափի սահմանափակման, պայմանագրով որոշված բոլոր տուժանքների հանրագումարի հաշվարկման, տուժանքի հաշվարկային դրույքի որոշման հետ կապված իրավակարգավորումներին և դրանց առնչությամբ ծագած գործնական որոշ խնդիրներին, որոնց վերաբերյալ քննարկման ընթացքում ներկայացվել են համապատասխան դիրքորոշումներ:

Հանդիպման արդյունքում ձեռքբերված պայմանավորվածության համաձայն՝ քննարկման մասնակիցները առաջիկայում կներկայացնեն տուժանքի իրավակարգավորումների հստակեցմանն ուղղված առաջարկություններ, որոնց հիման վրա հետագայում կկատարվեն համապատասխան օրենսդրական փոփոխություններ:

Աղբյուր` Փաստինֆո