Փաստ ինֆո

Շիրակի մարզի ընդհանուր իրավասության դատարանը հիմնավորված է համարել Գյումրիում տեղակայված 102-րդ ռուսական ռազմաբազայի զինծառայող 21-ամյա Դմիտրի Յալպաևի սպանության համար 22-ամյա Արման Ջանջուղազյանին առաջադրված մեղադրանքը և նրան դատապարտել 22 տարվա ազատազրկման։

«Փաստինֆո»-ն ավելի վաղ հայտնել է, որ 2017-ի ապրիլի 22-ին՝ Գյումրիի Դուդկոյի 4 հասցեում գործող «Արգո» խանութի մոտ հայտնաբերվել էր ռուս զինծառայող, 21-ամյա Դմիտրի Յալպաևի դին՝ կտրած-ծակած մարմնական վնասվածքներով։ Կարճ ժամանակ անց հայտնաբերվել էր կասկածյալը եւ ձերբակալվել։

Առերևույթ հանցագործություն կատարած անձը կտրող-ծակող առարկայով 8 հարված է հասցրել տուժողի պարանոցի, թիկունքի և գլխի հատվածին։ Ստացած մարմնական վնասվածքներից Դ.Յալպաևը տեղում մահացել է։ Նախնական քննության տվյալներով՝ նա իրեն համարել է «Իսլամական պետություն» ահաբեկչական խմբավորման համակիր:

Հոկտեմբերի 31-ի դատավճռով՝ Ջանջուղազյանը 20 տարվա ազատազրկման է սպանության համար, իսկ 2 տարվա ազատազրկման՝ սառը ապօրինի զենք պահելու համար։

Նկատենք, որ նա ներկայումս ամբաստանյալի կարգավիճակ ունի նաեւ մեկ այլ քրեական գործով։

Պարզվում է՝ նախնական կալանքի տակ գտնվելու ժամանակ՝ 2018թ․ մարտի 7-ին, Արման Ջանջուղազյանը «Նուբարաշեն» ՔԿՀ-ում կրելու ընթացքում բռնություն է գործադրել ՔԿՀ աշխատակիցների նկատմամբ։

Մասնավորապես՝ ըստ խցերի և պատժախցերի կալանավորված անձանց ու դատապարտյալների թվաքանակի հաշվառում իրականացնելու ժամանակ, խախտելով ներքին կաննակարգը, մոտեցել է խցի դռան դիտանցքին և ակել այն, որից հետո հիմնարկի հերթափոխի խմբի գլխավոր մասնագետ Թաթուլ Հակոբյանի և նույն հերթապահ խմբի գլխավոր մասնագետ Հրաչյա Նիկողոսյանի կողմից խցի դիտանցքը ներսի կողմից չփակելու և լույսը չանջատելու դիտավորությունից հետո, հարվածել է Թաթուլ Հակոբյանի և Հրաչյա Նիկողոսյանի դեմքին՝ վերջիններիս առողջությանը պատճառելով առողջության թեթև վնասի հատկանիշներ չպարունակող մարմնական վնասվածք։

Այս քրեական գործը գտնվում է Երևանի ընդհանուր իրավասության դատարանի վարույթում։

Աղբյուր` Փաստինֆո