Փաստ ինֆո

Երեւանի ընդհանուր իրավասության առաջին ատյանի դատարանում դեռ շարունակվում է քննարկել «Մարտի 1»-ի քրեական գործով նախկին քննչական խմբի ղեկավար Վահագն Հարությունյանի նկատմամբ որպես խափանման միջոց կալանավորումն ընտրելու մասին ՀՔԾ-ի միջնորդությունը։

Հիշեցնենք, որ նախօրեին ՀՔԾ-ն հաղորդագրություն տարածեց առ այն, որ մարտի 1-ի քրեական գործով կեղծվել են ապացույցները, մասնավորապես պարկուճները և որոշում է կայացվել այդ ժամանակ քննչական խմբի ղեկավարին և փորձագետին մեղադրանք առաջադրել՝ միասնական դիտավորությամբ ապացույցներ կեղծելու համար՝ ՀՀ քրեական օրենսգրքի 38-349-րդ հոդվածի 3-րդ մասի 1-ին կետով։ Նրանց նկատմամբ հայտարարվել է հետախուզում:«ՀՀ հատուկ քննչական ծառայության քննիչի կողմից միջնորդություններ են ներկայացվել դատարան` նրանց նկատմամբ կալանավորումը որպես խափանման միջոց ընտրելու համար», - նշված է ՀՔԾ-ի հաղորդագրության մեջ։

Վահագն Հարությունյանը լրագրողներին տված հարցազրույցում ապօրինի է համարել իր նկատմամբ հետախուզման հայտարարումը՝ նշելով, որ ՀՔԾ քննիչին ինքը տեղեկացել էր գտնվելու վայրի մասին՝ թե գրավոր և թե բանավոր հեռախոսազրույցի ժամանակ։

«Հետախուզում հայտարարում են երկու հիմքերի առկայության դեպքում՝ երբ հայտնի չէ գտնվելու վայրը և թաքնվում է քննությունից: Սա հասկանալու համար իրավաբան լինել պետք չէ: Հիմա իմ գտնվելու վայրի մասին՝ ես երկրից մեկնել եմ հուլիսին: Աշխատանքից ազատվելուց հետո մեկնել եմ արտերկիր, այնուհետև՝ Ռուսաստան, որտեղ որոշեցի լուծել իմ առողջական խնդիրները, որոնք բավականին լուրջ էին՝ կապված սրտանոթային համակարգի հետ՝ միջամտություններ, ստենտավորում և ծնկահոդի լուրջ խնդիրներ, որոնք վաղուց տեղի ունեցած ավտովթարի հետևանք էին: Ինչևէ, ժամանակս որոշեցի տրամադրել, լուծել այդ խնդիրները: Սեպտեմբերի 11-ին իմ՝ Երևանի բնակավայր ստացել եմ ծանուցում, իմ ներկայացուցիչ փաստաբանը հատուկ պարզաբանում է ներկայացրել քննիչին այն մասին, որ չեմ կարող ներկայանալ հարցաքննության, որովհետև բուժման նպատակով գտնվում եմ Մոսկվա քաղաքում, անհրաժեշտության դեպքում կարող եմ տրամադրել իմ բնակության վայրի մասին տեղեկանք, կոնտակտային տվյալներ, և բուժման հետագա ընթացքի վերաբերյալ տեղեկատվություն:

Հաջորդ ծանուցագիրը, ըստ Վ.Հարությունյանի, Երևանում գտնվող տան հասցեով ուղարկվել է հոկտեմբերի 30-ին: Հեռախոսազրույց է ունեցել ծանուցագիրը բերած անձի հետ, տեղեկացրել, որ Մոսկվա քաղաքում է, կազմվել է համապատասխան արձանագրություն, որ գտնվում է Մոսկվայում բուժման նպատակով, խնդրել է ծանուցագիրը փոխնցել որդուն։ Իսկ հոկտեմբերի 31-ի առավոտյան ինքն է զանգահարել եմ ՀՔԾ, խոսել ծանուցումներ ուղարկած քննիչների հետ, հաստատել իմ ներկայացուցչի ներկայացրած տվյալները, ի լրումն, ներկայացրել Մոսկվայում իր բնակության վայրի հասցեն և հեռախոսահամարը, որը մշտապես օգտագործում է:

ՀՔԾ պետ Սասուն Խաչատրյանն այսօր հայտարարել է, որ հետախուզումը ոչ միայն անձի գտնվելու վայրը պարզելն է, այլ ենթադրում է նաև հետախուզվողին վարույթն իրականացնող մարմնին ներկայացնելը:

«Այսինքն, միայն վայրը հայտնի լինելը չի նշանակում, որ նրա նկատմամբ չի կարող հետախուզում հայտարարվել։ Նա այս տարի հուլիսին է լքել հանրապետության տարածքը», - լրագրողների հարցերին ի պատասխան ասաց Ս.Խաչատրյանը:

«Փաստինֆո»-ն տեղեկացավ, որ դատարանը դեռ ոորոշում չի կայացրել։ Վահագն Հարությունյանի փաստաբանները ցանկություն են հայտնել մասնակցել խափանման միջոցի միջնորդության քննարկմանը։ Նիստը երեկ գիշեր դատարանը հետաձգել էր մինչեւ այսօր ժամը 12-ը։ Ընթացքի մասին տեղեկություններ փատսաբաններից պարզել առաժյմ չհաջողվեց։

Աղբյուր` Փաստինֆո