Փաստ ինֆո

Բանակի ներգրավվածությունը մարտի 1-ի դեպքերին առավել քան հիմնավոր է, կառավարության այսօրվա նիստից հետո լրագրողների հետ ճեպազրույցում հայտարարեց Հատուկ քննչական ծառայության պետ Սասուն Խաչատրյանը։

Նրա ներկայացմամբ՝ կասկածներ կան, թե ում հրահանգով է բանակը միջամտել, սակայն հայտարարեց, որ այս այս պահին այդ մասին չի բարձրաձայնի. «Իհարկե կան կասկածներ, բայց ես դրանց մասին չեմ բարձրաձայնի, քննություն է կատարվում այդ ուղղությամբ, արդյունքների դեպքում անպայման կտեղեկացնեմ»։

Նշենք, որ նախօրեին ՀՔԾ-ն հաղորդագրություն տարածեց Մարտի 1-ի գործով քննչական խմբի նախկին ղեկավար Վահագն Հարությունյանի նկատմամբ հետախուզում հայտարարելու մասին, ով որպես մեղադրյալ է ներգրավվել ապրացույցները կեղծելու համար։

Ըստ Ս.Խաչատրյանի՝ հետախուզումը ոչ միայն անձի գտնվելու վայրը պարզելն է, այլ ենթադրում է նաև հետախուզվողին վարույթն իրականացնող մարմնին ներկայացնելը:

«Այսինքն, միայն վայրը հայտնի լինելը չի նշանակում, որ նրա նկատմամբ չի կարող հետախուզում հայտարարվել։ Նա այս տարի հուլիսին է լքել հանրապետության տարածքը», - լրագրողենրի հարցերին ի պատասխան ասաց Ս.Խաչատրյանը:

ՀՔԾ-ի հաղորդագրության համաձայն՝ դեպքի վայրի տարբեր տեղամասերից զննությամբ հայտնաբերված տարբեր տեսակի և տրամաչափի հրազեններից կրակված, իրեղեն ապացույց հանդիսացող շուրջ 1000 պարկուճները փոխարինվել են Ոստիկանության զորքերի սպառազինության մեջ մտնող նույն տեսակի այլ հրազեններից կրակված պարկուճներով:

Հարցին, թե այդ 1000 պարկուճները կրակված են եղել բանակի՞ զենքերից՝ ՀՔԾ պետն պատասխանեց. - «Ես հիմա չեմ կարող ասել, որ այդ բոլոր հազարն էլ բանակի զենքերից են եղել, բայց ապացույցները խոսում են այն մասին, որ առնվազն հազար պարկուճ փոխվել է. իրեղեն ապացույց հանդիսացող 1000 պարկուճներ փոխարինվել են Ներքին զորքերի սպառազինության մեջ գտնվող հրազեններից կրակված պարկուճներով։ Ներքին զորքերի այդ զենքերը կան»։ Ըստ նրա ունեն՝ զինվորականների ցուցմունքներ։

Աղբյուր` Փաստինֆո