Փաստ ինֆո

ՀՅԴ խմբակցության ղեկավար Արմեն Ռուստամյանը համաձայն չէ պնդման հետ, որ Ընտրական օրենսգրքի փոխությունները չընդունվեցին դաշնակցական երկու պատգամավորների բացակայության պատճառով։

«Մարդիկ պետք է սովորեն իրենց սխալները շտկել, այլ ոչ թե փորձեն դրանք ուրիշներին վերագրել»,- ասաց Ա.Ռուստամյանը՝ լրագրողների հետ զրույցում։

Ըստ նրա՝ եթե մի բան երկու անգամ չի ստացվում, դա նշանակում է, որ ինչ-որ բան սխալ է արվել:

«Այո, կոնսենսուս, համախոհություն, որ ասում են, ինչու են ասում, որ գործընթացը տեղի ունենա համախոհությամբ, այդ դեպքում պրոբլեմ չէր առաջանա: Իսկ քանի որ դրած է դեկտեմբեր ամիսը և ամեն ինչ հարմարեցվում է դրան, այսպիսի բաներ պետք է տեղի ունենան: Հիմնական պատճառը թողած, ուրիշ տեղեր են ման գալիս: Ի՞նչ սաբոտաժ, եթե մեր7 հոգուց 5 հոգին կողմ է քվեարկել: Եթե սա սաբոտաժ է համարվում, որ հարյուր տոկոսանոց մասնակցություն չկա, ուրեմն բոլոր այն օրենքները, որտեղ 105 հոգով չեն քվեարկել, սաբոտաժ է եղել: Ակնհայտ է չէ՞, որ սաբոտաժի մեղադրանքը օդից վերցրած է»,- շեշտեց նա:

Նա ընդգծեց, որ խնդիրը նախագծի համահեղինակներինն էր. «Թող կազմակերպողները բարի լինեին ամեն ինչ անեին այնպես, որ համոզված լինեին՝ անցնելու էր: Այդ երկու ձայն պակասելը նշանակում էր, որ պետք է բոլորի հետ համախոհությամբ անցներ, ոչ թե համարեին, որ, ուզեն թե չուզեն, պետք է իրենք ապահովեն՝ այն էլ հարյուր տոկոս քվեարկություն: Դաշնակցությունից մեկ հոգի էլ կողմ քվեարկի, դա կնշանակի, որ ՀՅԴ-ն իր տեսակետը հայտնել է: Անպայման պե՞տք է 100 տոկոսանոց լինի մասնակցությունը: Սա ամբողջ աշխարհում ընդունված նորմալ պրակտիկա է», - ասաց Ռուստամյանը։

Հիշեցնենք, որ այսօր ԱԺ արտահերթ նիստում Ընտրական օրենսգրքի նախագիծը կրկին չընդունվեց։ Այն սահմանադրական օրենք էր, որի ընդունման համար անհրաժեշտ էր 63 ձայն, մինչդեռ նախագծին կողմ քվեարկեց 62 պատգամավոր։ ՀՅԴ խմբակցությունից երկու պատգամավոր՝ Անդրանիկ Կարապետյանը և Ռոմիկ Մանուկյան բացակայում էին։

Աղբյուր` Փաստինֆո