Փաստ ինֆո

ՀՀ արդարադատության նախարարի պաշտոնակատար Արտակ Զեյնալյանը հոկտեմբերի 27-ին մասնակցել է Ս. Փարաջանովի թանգարանում տեղի ունեցած «Ստեղծարար անԱԶԱՏՈՒԹՅՈՒՆ» խորագրով միջոցառմանը, որի ընթացքում հանրության ուշադրությունն է հրավիրվել անազատության մեջ գտնվող անձանց կրթության իրավունքի իրացման հարցերին: Այս մասին հայտնում է, ԱՆ տեղեկատվության և հասարակայնության հետ կապերի վարչությունը:

Միջոցառումը կազմակերպերլ է Դի-Վի-Վի Ինթերյնեյշնալի հայաստանյան գրասենյակը «Հանուն մարդու իրավունքների. կրթությունը բանտերում» ծրագրի շրջանակում՝ Գերմանիայի Դաշնության արտաքին գործերի նախարարության աջակցությամբ:

ՀՀ արդարադատության նախարարի տեղակալ Սուրեն Քրմոյանը շնորհակալություն է հայտնել գործընկերներին ազատազրկման վայրերում գտնվող անձանց իրավունքների և շահերի պաշտպանությանը նվիրված նախաձեռնության համար և նշել, որ բանտային կրթության արդյունավետ գործող համակարգերի և ծրագրերի առկայության դեպքում դրական ազդեցությունը տեսանելի կլինի ամբողջ հասարակության համար:

Փոխնախարարի խոսքով, վերջին շրջանում Կառավարությունը քրեական արդարադատության և քրեական պատիժների ոլորտում մեծածավալ բարեփոխումներ է իրականացնում: «Քրեակատարողական հիմնարկներում արմատական փոփոխություններ են իրականացվում: Գործարկվել են նոր Սահմանադրության կարգավորումներին համապատասխան գործող ներման, պատժից պայմանական վաղաժամկետ ազատման համակարգերը: 

Միևնույն   ժամանակ վերականգնողական արդարադատություն սկզբունքների և մեխանիզմների ներդրումը քրեական արդարադատության ոլորտում պահանջում է ոչ միայն իրավական, այլ նաև սոցիալական, հոգեբանական, կրթական լուծումներ և կառուցակարգեր»,- ասել է Սուրեն Քրմոյանը: Նա ընդգծել է, որ այդ խրախուսական ինստիտուտների կիրառումը քրեական արդարադատության ոլորտում արդյունավետ կլինի այն դեպքում, երբ դրանց կիրառմամբ ազատ արձակված անձինք պատիժը կրելու ընթացքում կրթական և վերսոցիալականացման գործընթացներին մասնակից կլինեն. արդյունքում կնվազեցվի վերջիններիս հասարակական վտանգավորությունը:

Սուրեն Քրմոյանն ընդգծել է, որ կրթության իրավունքի  և, ընդհանրապես, ստեղծագործական գործունեության ապահովումը հիմնաքարային նշանակություն ունեն հանցագործությունների կանխարգելման,  ազատվելուց հետո այդ անձանց վերաինտեգրման առումով: «Ուրախալի է, որ հանրության կողմից այս աշխատանքների կարևորությունն օր օրի առավել գիտակցվում է  և վստահ եմ, որ այս միջոցառումն էլ իր դերն ու նշանակությունն է ունենալու խնդրի լուսաբանման և նոր հնարավորությունների ստեղծման առումով»,- նշել է արդարադատության նախարարի տեղակալը:

Հանդիպմանը ներկա Հայաստանում Գերմանիայի Դաշնային Հանրապետության արտակարգ և լիազոր դեսպան Բերնհարդ Մաթիաս Քիսլերը ևս կարևորել է մարդու շարունակական կրթության իրավունքը, շփումը արվեստի և մշակույթի հետ ու նշել, որ կրթություն ստանալու իրավունքը չի կարող սահմանափակվել բանտի ներսում: 

Հանդիպմանը ներկա են եղել նաև ՀՀ կրթության և գիտության նախարարի տեղակալ Հովհաննես Հովհաննիսյանը, Գերաշնորհ Տ. Միքայել եպիսկոպոս Աջապահյանը, Ծրագրի համակարգող Գայանե Հովակիմյանը, այլք:

Միջոցառման շրջանակում անդրադարձ է եղել նաև Սերգեյ Փարաջանովի բանտային շրջանի կյանքին ու գործունեությունը, ինչպես նաև ներկայացվել են տարբեր ժամանակաշրջանների հայ և օտարերկրացի հայտնի ստեղծագործողների բանտային գործերը՝ բացիկների և պաստառի միջոցով:

Աղբյուր` Փաստինֆո