Փաստ ինֆո

Մի շարք փաստաբանների կարծիքով՝ կառավարության կողմից առաջարկվող Համաներման նախագիծն ամենեւին էր աննախադեպ չէ և ոչ էլ ամենածավալունը, ինչպես ավելի վաղ հայտարարվել էր։
Հիշեցնենք, որ ՀՀ արդարադատության նախարար Արտակ Զեյնալյանը հոկտեմբերի 13-ին հայտարարել էր, որ լինելու է ամենածավալուն համաներումը:

Երեկ պաշտոնապես հրամապարակվել է «Էրեբունի-Երևանի հիմնադրման 2800-ամյակի և Հայաստանի առաջին Հանրապետության անկախության հռչակման 100-ամյակի կապակցությամբ քրեական գործերով համաներում հայտարարելու մասին» ՀՀ օրենքի նախագիծը, որն արդեն որոշ դժգոհությունների տեղիք է տվել։

Հարցին անդրադարձել է փաստաբան Գեղամ Հակոբյանը։

«Ծանոթանալով համաներում հայտարարելու մասին օրենքի նախագծին, զարմանքով արձագանքում եմ, որ այս համաներումը աննախադեպ որակելու որևէ իրական հիմք գոյություն չունի, ինչպես հայտարարվել էր և սպասվում էր հասարակության կողմից։ Ավելին, այս համաներումը ավելի քիչ թվով մարդկանց նկատմամբ կարող է կիրառվել, քան օրինակ 2011 թվականին հայտարարված համաներումը։

Որպեսզի գոնե իրական տարբերություն լիներ նախորդներից, առնվազն անհրաժեշտ է նախ ընդհանուր կիրառությունը՝ պատժից ազատելու առումով ոչ թե առավելագույնը 3 տարի ազատազրկման դեպքում նախատեսվեր, այլ՝ գոնե 4 տարվա։

Բացի այդ, որպես չկիրառման հիմք կարծում եմ պետք է նախագծից հանվի նյութական վնասի պարտադիր հատուցման պահանջը, առավելևս վեճի առկայութունը որպես չկիրառման հիմք նախատեսելը, որը տարբեր չարաշահումների տեղիք է տալու։

Ինչպես նաև նախագծի 4-րդ հոդվածի 4-րդ կետը վերանայման կարիք ունի և անհրաժեշտ է համաներումը կիրառել ոչ թե համակցությամբ՝ վերջնական պատժի նկատմամբ, այլ յուրաքանչյուր հոդվածով առանձին»,- ֆեյսբուքում գրառել է փաստաբանը՝ նշելով, որ դեռևս հնարավոր է շտկել և ավելի արժեքավոր դարձնել այս նախագիծը և հասարակության մոտ էլ երկար սպասումից հետո խաբվածության զգացում չառաջացնել։

Աղբյուր` Փաստինֆո