Փաստ ինֆո

ՀՀ վարչապետի պաշտոնակատար Նիկոլ Փաշինյանը կոռեկտ չի համարում Ամենայն Հայոց կաթողիկոսին համարել պետական բարձրաստիճան պաշտոնյա և դնել պետական կառավարման համակարգի աստիճանականության մեջ։

Նման կարծիք նա հայտնեց, երբ ՀՀ արդարադատության նախարարի ժամանակավոր պաշտոնակատար Արտակ Զեյնալյանը ներկայացրեց «Հատուկ պետական պաշտպանության ենթակա անձանց անվտանգության ապահովման մասին» Հայաստանի Հանրապետության օրենքում լրացումներ կատարելու մասին» Հայաստանի Հանրապետության օրենքի նախագծի վերաբերյալ Հայաստանի Հանրապետության կառավարության առաջարկության մասին որոշման նախագիծը: 

Նշենք, որ նախագծի հեղինակը ԱԺ «Հանրապետական» խմբակցության պատգամավոր Միհրան Հակոբյանն էր, որն առաջարկում էր օրենքով երաշխավորել Ամենայն Հայոց կաթողիկոսի անվտանգության ապահովումը՝ ինչպես երաշխավորված է ԱԺ նախագահի, վարչապետի, ՀՀ նախագահ անվտանգությունը:

«Օրենքի նախագծի ընդունման դեպքում Ամենայն Հայոց կաթողիկոսի անվտանգության ապահովումը կերաշխավորվի օրենքով, ոչ թե վարչապետի հայեցողությամբ», - ասաց նախարարի պաշտոնակատարը՝ նշելով, որ կառավարությունը առաջարկում է օրենքի հոդվածները թողնել ամփոփոխ:

ՀՀ վարչապետի ժամանակավոր պաշտոնակատար Նիկոլ Փաշինյանը հայտարարեց, որ նման օրենսդրական փոփոխության անհրաժեշտություն չի տեսնում։

«Պետք չէ տպավորություն թողնել, որ Հայաստանում Ամենայն Հայոց կաթողիկոսի անվտանգությանը ինչ-որ բան է սպառնում, և եթե կա այդպիսի ընկալում, դա սխալ ընկալում է», - ասաց նա և ավելացրեց «Կարծում եմ, որ, իսկապես, տեղին չէ և եթե անհրաժեշտություն լինի, բնականաբար, այդ հարցը ես ինքս պատրաստ եմ քննարկել և ըստ անհրաժեշտության որոշում կայացնել և դրա համար օրենքի անհրաժեշտություն չեմ տեսնում: Առավել ևս, օրենքը բարձրաստիճան պետական պաշտոնյաների մասին է և ես չեմ կարծում, թե կոռեկտ է Ամենայն Հայոց կաթողիկոսին համարել պետական բարձրաստիճան պաշտոնյա և դնել պետական կառավարման համակարգի աստիճանականության մեջ», - ասաց վարչապետի պաշտոնակատարը:
Նախագծին կառավարությունը բացասական եզրակացություն տվեց։

Աղբյուր` Փաստինֆո