Փաստ ինֆո

Ուզում եմ, որ ազնիվ լինենք մեր պատկերացումներում, դիրքորոշումներում ու հայտարարություններում,- հայտարարել է ՀՀ ԱԺ նախագահ Արա Բաբլոյանը` լրագրողների խնդրանքով մեկնաբանելով երկուշաբթի օրը ևս մեկ անգամ Ընտրական օրենսգրքի փոփոխությունները քվեարկության դնելու վերաբերյալ նախաձեռնությունը։

Նա ընդգծեց, որ ներկայումս հանրապետականը փոքրամասնություն է խմբակցություններում, գուցե 40 մարդ էլ չկա, հետևաբար ճիշտ չէ պատասխանատվությունը ընդդիմության վրա գցել։

«Կան առնվազն 67-69 պատգամավոր, որոնք տվել են իրենց համաձայնությունը, մի մասը բանավոր, մի մասը գրավոր, որ իրենք կաջակցեն և կանցնի։ Ցավալին այն է, որ մարդիկ տալով այդ համաձայնությունը, խոսքով են ասում, բայց գործով չարեցին։ Ես համաձայն եմ այն մոտեցմանը, որ նրանք ովքեր չեն կատարել իրենց պարտքը, չեն եկել քվեարկության, իրենց վրա է դրված, որ հավաքեն ստորագրություններ, նորից կազմակերպեն արտահերթ նիստ։ Սա շատ ճիշտ մոտեցում է, որ կառավարությունը չի գնացել երկրորդ անգամ հրավիրելու, այլ տվել է այդ հնարավորությունը նրանց, ովքեր չիրականացրեցին իրենց պարտավորությունը», - ասաց Բաբլոյանը։

Նա ընդգծեց, որ որպես ԱԺ նախագահ՝ ինքը կատարում է իր պարտականությունները, տվել է քվեարկությունը հետաձգելու հնարավորությունը, որպեսզի եթե կան ցանկացողներ, հասցնեն գալ ու քվեարկել, ո թեև Հանրապետական խմբակցությունը կարող էր դեմ լինել քվեարկության հետաձգմանը։

«Հանրապետական խմբակցությանը որևէ ճնշում չներգործեց ինձ վրա՝ փորձելով համոզել, որ ես չտամ համաձայնություն», - ասաց նա։

Աղբյուր` Փաստինֆո