Փաստ ինֆո

ՀՀ ազգային ժողովի «Ծառուկյան» և «Ելք» խմբակցությունները ստորագրահավաք են սկսելու՝ հոկտեմբերի 29-ին արտահերթ նիստ հրավիրելու և Ընտրական օրենսգրքի փոփոխությունների փաթեթը կրկին քննարկելու համար: ԱԺ հերթական նիստում այսօր այս մասին հայտարարեց «Ծառուկյան» խմբակցության անդամ Նաիրա Զոհրաբյանը:

«Այսօր «Ծառուկյան» դաշինքը՝ «Ելք»-ի հետ, կազմակերպում է ստորագրահավաք, որով երկուշաբթի արտահերթ նիստի օրակարգով կրկին լինելու է Ընտրական օրենսգրքի փոփոխությունը: Հորդորում եմ ՀՀԿ –ի այն գործընկերներին, որոնք նշում էին, որ նոր Ընտրական օրենսգիրքը շատ ավելի արդար և գրագետ ընտրական կարգ է սահմանում, չբոյկոտել, չտանել սադրանքների և մասնակցել Ընտրական օրենսգրքի քննարկմանը»,-ասաց Զոհրաբյանը:

Նա վստահեցրեց, որ այն պատգամավորները, ովքեր ի սկզբանե հավանություն են տվել օրենսգրքին, ներկա են լինելու և քվեարկելու են:

Հիշեցնենք, որ երեկ ՀՀ ազգային ժողովն առաջին ընթերցմամբ չընդունեց Ընտրական օրենսգրքի բարեփոխումների փաթեթը:

«Հայաստանի Հանրապետության ընտրական օրենսգիրք» ՀՀ սահմանադրական օրենքում փոփոխություններ և լրացումներ կատարելու մասին» օրենքի և հարակից օրենքներում փոփոխություններ և լրացումներ կատարելու մասին նախագծերի փաթեթի վերաբերյալ կառավարության օրենսդրական նախաձեռնությանը կողմ քվեարկեց 56, դեմ՝ 3 պատգամավոր: Օրինագծերի փաթեթը հաստատելու համար անհրաժեշտ է 63 պատգամավորի ստորագրություն:

Աղբյուր` Փաստինֆո