Փաստ ինֆո

ՀՀԿ-ն կողմ չէ ընտրական օրենսգրքի վերաբերյալ ներկայացված փոփոխություններին, լրագրողների հետ զրույցում այսօր ասել է ՀՀ ԱԺ փոխնախագահ Արփինե Հովհաննիսյանը։

«Դրա հիմքում ընկած են մի շարք պատճառներ, որոնցից հիմնականն այն հապճեպությունն է, որոնցով այս փոփոխությունները ներկայացվել են։ Թե Վենետիկի հանձնաժողովի, թե ԵԱՀԿ/ԺՀՄԻԳ-ի եզրակացությունները այս հարցի կապակցությամբ չկա։ Փաստենք, որ առաջին անգամ նրանք Ընտրական օրենսգրքի վերաբերյալ չեն ներկայացրել տեսակետ», - ասաց Հովհաննիսյանը։

Անդրադառնալով Վենետիկի հանձնաժողովի նախագահի հայտարարությանը՝ Հովհաննիսյանը նշեց, որ նա գնահատական է տվել փոփոխությունների բնույթին, որտեղ բառացիորեն նշված է խոշոր փոփոխությունների մասին։

«Կան փոփոխություններ, որոնք էական բնույթի են կամ խոշոր փոփոխություններ են և կան այնպիսիք, որոն քիչ էական են։ Խոշոր փոփոխությունների հետ կապված հանձնաժողովի դիրքորոշումը շարունակում է մնալ նույնը՝ դրանք պիտի կատարվեն այնպիսի ժամանակահատվածում, որպեսզի քաղաքական ուժերը ժամանակ ունենան ու դրա համար այդ մեկ տարին անընդհատ նշվում է։ Անկեղծ ասեմ, որ ես բացարձակապես չէի ակնկալում, որ որևէ մեկի կամ որևէ երկրի կամ անձի կամ որևէ քաղաքական ուժի համար Վենետիկի հանձնաժողովը կփոխի 47 անդամ-պետությունների համար տարիներ շարունակ ընտրությունների համար մշակած մոտեցումը։ Սա նորմալ է», - նշեց Հովհաննիսյանը։

Արփինե Հովհաննիսյանն անդրադարձավ նաեւ իրավունքի ուժով արտահերթ խորհրդարանաան ընտրությունների անցկացմանը՝ նշելով, որ հոկտեմբերի 23-ի երեկոյան լրանում է վարչապետի հրաժարականի մեկ շաբաթը, և հոկտեմբերի 24-ին Ազգային ժողովն օրենքի ուժով պետք է արտահերթ նիստ գումարի:

«Մնացած ձևակերպումները ես այս պահին չեմ ուզում որպես ՀՀԿ ներկայացուցիչ՝ իմ արտահայտած դիրքորոշմամբ կանխորոշեմ ինչ-որ դիրքորոշում: Իրավաբանների մեջ կա որոշակի անհամաձայնություն՝ ինչպես մեկնաբանել Սահմանադրության այն հոդվածը, որը վերաբերում է առաջին փուլից հետո վարչապետի քվեարկության եզրույթի մեկնաբանությանը: Ի վերջո, սրա մասին տեղեկացված են կառավարության տարբեր ներկայացուցիչներ, ասել են, որ կհանգեն եզրակացության: Եթե եզրակացության կհանգեն և այդ եզրակացության համապատասխան տարբերակ առաջինը կլինի այն, որ որոշեն Նիկոլ Փաշինյանի թեկնածություն առաջադրել ու հետո ակնկալել, որ կլինի քվեարկություն, նա չի ընտրվի, սա մի տարբերակ է: Երկրորդ տարբերակը, երբ պարզապես որևէ մեկը թեկնածու չի առաջադրի, և Սահմանադրության համապատասխան նորմը կմեկնաբանեն այդկերպ»,- ասաց Արփինե Հովհաննիսյանը:

Տիկին Հովհաննիսյանը երաշխավորեց, որ վարչապետի թեկնածու առաջադրելու տեսքով անակնկալներ չեն սպասվում։

Աղբյուր` Փաստինֆո