Փաստ ինֆո

Լոռու մարզի ընդհանուր իրավասության դատարանը վարույթ չի ընդունել Լոռու մարզային քննչական վարչության նախկին պետ Թաթուլ Շուշանյանի քրեական գործը։ Հիշեցնենք, որ նա մեղադրվում է ՀՀ քրեական օրենսգրքի 311-րդ հոդվածի 4-րդ մասի 2-րդ կետի և 308-րդ հոդվածի 1-ին մասով։ Ըստ ՀՔԾ-ի՝ Ալավերդիում տեղի ունեցած սպանության գործով Վլադիմիր Դավթյանի և Վահագն Աբգարյանի օգտին իր լիազորությունների շրջանակում ակնհայտ ապօրինի գործողություններ կատարելու և անգործություն դրսևորելու համար, ենթադրաբար, Վահագն Աբգարյանից պահանջել և անձամբ ստացել է առանձնապես խոշոր չափերով կաշառք, ինչպես նաև չարաշահել է իր պաշտոնեական լիազորությունները։

Քրեական գործով որպես մեղադրյալ են ներգրավվել ևս երկու քննիչ՝ Արայիկ Ներսիսյանին մեղադրանք է առաջադրվել այն բանի համար, որ նա զբաղեցնելով ՀՀ քննչական կոմիտեի Լոռու մարզային քննչական վարչության հատկապես կարևոր գործերով ավագ քննիչի պաշտոնում․ ունենալով արդարադատության կապիտանի կոչում, հանդիսանալով պետական հատուկ ծառայություն և իշխանության ներկայացուցչի գործառույթներ մշտապես իրականացնող պաշտոնատար անձ, անձնական այլ շահագրգռվածությունից ելնելով՝ չարաշահել է իր պաշտոնեական լիազորությունները։

Արտակ Հովհաննիսյանին մեղադրանք է առաջադրվել այն բանի համար, որ նա զբաղեցնելով ՀՀ քննչական կոմիտեի ՀԿԳ քննության գլխավոր վարչության հատկապես կարևոր գործերով ավագ քննիչի պաշտոնը, ունենալով արդարադատության փոխգնդապետի կոչում, հանդիսանալով պետական հատուկ ծառայություն և իշխանության ներկայացուցչի գրծառույթներ մշտապես իրականացվող պաշտոնատար անձ, անձնական այլ շահագրգռվածությունից ելնելով՝ չարաշահել է իր պաշտոնեական լիազորությունները, որն էական վնաս է պատճառել պետության օրինական շահերին, ինչպես նաև խոշոր չափերով կաշառք է ստացել։

Քրեական գործով նախաքննությունն իրականացվել է ՀՔԾ-ում և մեղադրական եզրակացությամբ այն դատարան ուղարկվել 2018 թվականի սեպտեմբերի 6-ին։ Ի սկզբանե գործն ուղարկվել է Երևանի ընդհանուր իրավասության դատարան, սակագրվել դատավոր Արման Հովհաննիսյանին, ով սակայն այն վարույթ չի ընդունել և սեպտեմբերի 17-ին որոշում է կայացրել ըստ ընդդատության Լոռու մարզի ընդհանուր իրավասության դատարան ուղարկելու մասին։ «Արդար դատաքննության կարևոր պայմաններից մեկը հենց գործի բազմակողմանի, արագ (ողջամիտ ժամկետում) և մատչելի քննության ապահովվելն է: Ուստի տվյալ գործի քննությունն առավել արդյունավետ կարող է իրականացվել Լոռու մարզում, քանի որ բացի այն հանգամանքից, որ իրավական լուծման առումով դա շատ ավելի հիմնավոր է, նաև գործով կազմված դատակոչի ցուցակում ընդգրկված անձանց մեծամասնությունը բնակվում են հենց Լոռու մարզում»,- նշել էր դատարանը։

Սակայն «Փաստինֆո»-ի տեղեկություններով՝ Լոռու դատարանը ևս քրեական գործը վարույթ չի ընդունել և հոկտեմբերի 1-ին որոշում է կայացրել դիմել Վճռաբեկ դատարանի նախագահին՝ ընդդատության մասին վեճը լուծելու համար։ «Տվյալ դեպքում Թաթուլ Շուշանյանին և Արայիկ Ներսիսյանին մեղսագրվող հանցագործություններն ավարտվել են Լոռու մարզում, իսկ Արտակ Հովհանիսյանին մեղսագրվող հանցավոր արարքներն ավարտվել են Երևան քաղաքում, ընդ որում Արտակ Հովհանիսյանին վերագրվող հանցավոր արարքների դեպքերով ՀՀ Հատուկ քննչական ծառայությունում հարուցվել է առանձին քրեական գործ, որը միացվել է Թաթուլ Շուշանյանի և Արայիկ Ներսիսյանի վերաբերյալ քրեական գործին և քրեական գործի նախաքննությունն ավարտվել է Երևան քաղաքի առաջին ատյանի դատարանի դատական տարածքում՝ ՀՀ հատուկ քննչական ծառայության կողմից, հետևաբար գործը ՀՀ քրեական դատավարության օրենսգրքի 48-րդ հոդվածով սահմանված կարգով ընդդատյա է Երևան քաղաքի առաջին ատյանի դատարանին, մինչդեռ նույն դատարանի որոշմամբ գործն ըստ տարածքային ընդդատության՝ ուղարկվել է Լոռու մարզի առաջին ատյանի ընդհանուր իրավասության դատարան, հետևաբար վեճ է առաջացել գործի տարածքային ընդդատության մասին, որը ենթակա է լուծման ՀՀ վճռաբեկ դատարանի նախագահի կողմից»,- նշված է Լոռու մարզի ընդհանուր իրավասության դատավոր Ս.Բաղդասարյանի որոշման մեջ։

«Առաջին լրատվական»-ի տեղեկություններով` երեկ փոխվել է Թաթուլ Շուշանյանի նկատմամբ ընտրված խափանման միջոցը և նա կալանավորումից ազատ է արձակվել։

Նյութն արդեն թողարկվել էր, երբ փաստաբանից տեղեկացանք, որ վճռաբեկ դատարանի գործի քննությունը վերապահել է Երևանի ընդհանուր իրավասության դատարանին։

Աղբյուր` Փաստինֆո