Փաստ ինֆո

Կառավարության նախաձեռնությամբ այսօր հրավիրված ԱԺ արտահերթ նիստում  Ընտրական օրենսգրքում փոփոխություններ կատարելու մասին նախագիծը չընդունվեց։ Սահմանադրական օրենք համարվող ԸՕ-ի մեջ փոփոխություններ և լրացումներ կատարելու օրինագիծն ընդունելու   համար անհրաժեշտ 63 ձայնը չապահովվեց և օրինագծին կողմ քվեարկեց ընդամենը 56 պատգամավոր, դեմ էին 3-ը:

 Հիշեցնենք, որ ԱԺ նախագահ Արա Բաբլոյանը ընդունէլ էր կառավարության առաջարկությունը և մեկուկես ժամով հետաձգել  քվեարկությունը, որպեսզի պատգամավորները հասցնեին գալ ու ներկա գտնվել քվեարկությանը: Այդուհանդերձ, պահանջվող քվորումը չապահովվեց, և փաստաթուղթը չընդունվեց:

Օրինագծին դեմ էր Հանրապետական խմբակցությունը, որի պատգամավորների մեծ մասը բոյկոտեցին ու չմասնակցեցին քվեարկությանը: Որոշ վերապահումներ ուներ Դաշնակցություն խմբակցությունը, սակայն կողմ քվեարկեցին:

ԱԺ «Ծառուկյան» խմբակցությունը, համաձայն վարչապետի պաշտոնակատար Նիկոլ Փաշինյանի հետ կնքած հուշագրի, կողմ քվեարկեց նախագծին: 

ԱԺ Հանրապետական խմբակցության հիմնականում գործարար թևը ներկայացնող  պատգամավորների մեծ մասը, որոնք վերջերս ստորագրությամբ միացել էին Փաշինյանին, ներկա չէին ԱԺ արտահերթ նիստին:

ԸՕ-ն սահմանադրական օրենք է, որի ընդունման համար անհրաժեշտ է պատգամավորների 2/3-րդի ձայնը, այսինքն՝ 63 պատգամավոր, մինչդեռ խորհրդարանում այսօր առավոտյան գրանցված պատգամավորների թիվը 57 էր:

Աղբյուր` Փաստինֆո