Փաստ ինֆո

ՀՀ վարչապետի պաշտոնակատար, «Իմ քայլը» դաշինքի մեջ մտնող «Քաղաքացիական պայմանագիր» կուսակցության վարչության անդամՆիկոլ Փաշինյանը վստահ է, որ Հայաստանում հեղափոխության շունչն ամենաշատը զգացել են հենց Էջմիածնի բնակիչները: Այդ մասին Փաշինյանը նշեց Էջմիածնի քաղաքապետի թեկնածու՝ «Իմ քայլը» թիմը ներկայացնող Դիանա Գասպարյանի նախընտրական հանրահավաքին:

«ՀՀ-ում հեղափոխության շունչն ամենաշատը հենց Էջմիածնի բնակիչներն են զգում, որովհետև, կարծում եմ, որ էջմիածնեցիները կոռուպցիոն համակարգից, օլիգարխական համակարգից ամենաշատն էին տուժում ձեզ հայտնի ժամանակներում: Երբ ասում էին, թե ՀՀ-ում կա բդեշխություն, ամենաշատը դուք էիք դա տեսնում, երբ ասում էին, թե ՀՀ-ում կան ապօրինություններ ու կամայականություններ, ամենաշատը դուք էիք զգում, և ես ուզում եմ այսօր առաջին հերթին շնորհավորել ձեզ հաղթանակի կապակցությամբ, որովհետև հաղթանակը ձերն է, հաղթողը դուք եք, հեղափոխությունը դուք եք արել»,- ասաց վարչապետի պաշտոնակատարը:

Փաշինյանն ընդգծեց, որ հոկտեմբերի 21-ին ևս մեկ մարտահրավերի առաջ են կանգնած և, դիմելով Էջմիածնի ընտրողներին, նշեց, որ առաջիկա կիրակի նրանց առաջ դրված է լինելու ևս մեկ հեղափոխություն անելու հնարավորություն: «Այդ հեղափոխությունը պակաս կարևոր չէ, քան այն հեղափոխությունը, որ արդեն տեղի է ունեցել: Ես չգիտեմ՝ այդ վիճակագրությանը տեղյակ եք, թե չէ, բայց երրորդ հանրապետության պատմության ընթացքում ՀՀ-ն չի ունեցել ոչ մի կին քաղաքապետ, և ահա ձեր առաջ է: Իրականացրեք ևս մեկ աննախադեպ հեղափոխություն, և Դիանա Գասպարյանին պետք ընտրեք երրորդ հանրապետության առաջին կին քաղաքապետ»,-ասաց Նիկոլ Փաշինյանը:

ՀՀ վարչապետի պաշտոնակատարը նկատեց, որ ինքը չի թերագնահատում ոչ մի թեկնածուի,  բայց  կին քաղաքապետ ընտրելը չափազանց կարևոր հեղափոխություն է, որը կոչ է անում անպայման իրականացնել:

«1996-ից ՀՀ-ում անընդհատ փորձ էր արվում անել ժողովրդավարական հեղափոխություն, և անընդհատ դա չէր ստացվում տարբեր պատճառներով: Բայց ես ամենուր ասում եմ, թե որոնք էին այն վճռական գործոնները, որոնք հնարավոր դարձրին հեղափոխությունը 2018-ին. այդ գործոններից մեկը կանանց մասնակցությունն էր»,- ասաց Փաշինյանը:

Աղբյուր` Փաստինֆո