Փաստ ինֆո

«Փաստինֆո»-ի տեղեկություններով՝ ընտանեկան հերթական դաժան բռնության դեպքն է արձանագրվել Լոռիում, որտեղ կրկին կիզակետում է հայտնվել մանկահասակ երեխան։ Փոքրիկի կյանքը հաջողվել է փրկել միայն ընտանիքի մեծերի միջամտության արդյունքում։

Մեզ հաջողվեց պարզել, որ երիտասարդ ընտանիքում խժդժություններն ու վիճաբանությունները նոր երեւույթ չեն, սակայն հերթական ընտանեկան վիճաբանության ժամանակ որպես թիրախ է ընտրվել նաեւ նրանց մանկահասակ՝ 10 ամսական աղջիկը։ Դեպքը տեղի է ունեցել հոկտեմբերի 15-ին, որի ժամանակ ամուսինը ծեծել է կնոջը։ Ամուսինը հակընդդեմ բողոքն է ներկայացրել կնոջ նկատմամբ՝ պնդելով, որ իրենց տանը ծագած վիճաբանության ժամանակ կինը պտուտակահանով հարվածել է իր ձախ ոտքին` պատճառելով վնասվածք:

Ավելին՝ ըստ նրա կինը մուրճով փորձել է հարվածել նաեւ իրենց 10 ամսական դստերը, ինչին միջամտել ու կանխել է մայրը, որի հետեւանքով հարսը մուրճի փայտյա բռնակով հարվածել է սկեսուրին։ Բացի այդ փորձել է ինքնասպան լինել՝ պարանը փաթաթելով միաժամանակ իր և մանկահասակ դստեր պարանոցին՝ սպառնալով, որ կսպանի թե իրեն և թե երեխային։

«Փաստինֆո»-ն ձեռնպահ է մնում ամուսինների նույնականացնող տվյալները հրապարակելուց, սակայն հարցի վրա հրավիրում ենք մարզի սոցիալական ծառայությունների ուշադրությունը։ Դեպքի առթիվ ոստիկանությունում նյութեր նախապատրաստվում են և տարվում քննություն, բայց ակնհայտ է, որ ընտանեկան նման լարված հարաբերությունների պայմաններում միայն իրավապահների միջամտությունը բավարար չէ և անհրաժեշտ է սոցծառայողների և հոգեբանների միջամտությունը՝ հնարավոր վատ զարգացումներից խուսափելու, մանկահասակ երեխային բռնությունից պաշտպանելու համար։

Աղբյուր` Փաստինֆո