Փաստ ինֆո

Հայաստանի ազգային հավաքականը հոկտեմբերի 13-ին Ազգերի լիգայի խմբային փուլում կմրցի Ջիբրալթարի հետ: Այսօր նախախաղային ասուլիս է տվել մեր ընտրանու գլխավոր մարզիչ Արմեն Գյուլբուդաղյանցը.Այս մասին տեղեկացնում է՝ Armsport.am ից:

Նորանշանակ մարզիչը քանիցս նշեց, որ մեր ազգային հավաքականը խաղալու է հանուն հայ ժողովրդի, գործելու են արժանապատիվ: Գյուլբուդաղյանցը ևս շեշտեց, որ հագնելով հավաքականի խաղաշապիկը՝ պետք է պատասխանատվություն կրել:

 
 

Ads by Digisales
 

Խոսելով ֆուտբոլիստների մարզավիճակի մասին՝ Գյուլբուդաղյանցն ասաց.

«Մարկոսը մի թեթև վնասվածք ունի, բայց հույս ունենք, որ խաղին պատրաստ կլինի:

Օզբիլիսը և Չալըշըրը վնասվածք ունեն ու չեն միացել հավաքականին:

Մովսիսյանը բարձրակարգ ֆուտբոլիստ է, մեծ ցանկությամբ է եկել: Վստահ եմ, որ Մովսիսյանի միանալուց հետո ավելի ենք հզորացել: Ցանկությունն այնքան մեծ է, որը կբերի 100 տոկոսանոց պատրաստականության:

Մկրտչյանը դեռ լիովին պատրաստ չէ, բայց հաշվի առնելով նրա փորձը՝ վստահ եմ, որ մեծ օգուտ կտա հավաքականին»: 

Դիտակետում նոր ֆուտբոլիստներ ունենալու մասին

«Կա մի ֆուտբոլիստ՝ Ուրուգվայից, որ կցանկանայի միանար մեզ, սակայն գիտեք, որ նա դեռևս չի համաձայնվում գալ հավաքական: Մյուսները, որոնք կարող էին ուժեղացնել մեզ, վնասվածք ունեն: Ես վստահ եմ, որ այս կազմի տղաներն էլ ամեն ինչ կանեն հաղթանակի համար»:

Հավաքականի ավագի ու արժանապատիվ խաղի մասին

«Հավաքականի ավագը կշարունակի լինել Մխիթարյանը, նա թիմի առաջատարն է: Ինչ վերաբերվում է արժանապատիվ խաղին՝ ինձ համար այդպիսինն էր երիտասարդական թիմի՝ Մակեդոնիայի հետ հանդիպումը (3:3): Մինչև վերջ փորձեցին պայքարել՝ հասնելով արժանապատիվ արդյունքի ու խաղի: Համոզված եմ, որ վաղը նույնպես ֆուտբոլիստները կռիվ կտան դաշտում»:

Որքա՞ն ժամանակով է նախատեսված պայմանագիրը

«Ազգային ընտրանին գլխավորելու հրավերը ստացա հոկտեմբերի 7-ին, իսկ պայմանագիրս նախատեսված է մինչև 2020 թվականի մայիսը: Կարծում եմ, որ դա երկարաժամկետ պայմանագիր է: Հավատում եմ, որ երիտասարդական թիմում էլ կան խաղացողներ, որոնք կարող են ուժեղացնել մեր ազգային ընտրանին»:

Ջիբրալթարի ընտրանու և թիմի տակտիկայի մասին

«Փիլիսոփայության և տակտիկայի մասին չեմ կարող խոսել: Միայն կասեմ, որ վաղը տղաները դուրս են գալու դաշտ ու նվիրված խաղան մինչև վերջ:

Ուսումնասիրել ենք Ջիբրալթարին, համարձակ խաղ են խաղում: Խաղակցվածությունը բարձր մակարդակի վրա է: Միշտ փորձում են առաջին համարով խաղալ: Նրանք էլ կորցնելու բան ունեն և միայն այն, որ ժամանակից շուտ են ժամանել Երևան, դա խոսում է նրա մասին, որ լուրջ հավակնություններ ունեն: Եթե մտածենք, որ հեշտությամբ կհաղթենք, ապա կարող են վատ բաներ լինել: Պատմության մեջ էլ շատ են այդպիսի դեպքերը, երբ թերագնահատում ես մրցակցին ու պատժվում»:

Մակեդոնիայի հետ խաղի մասին

«Մակեդոնիայի հետ խաղում ճիշտ մարտավարություն էր ընտրել մարզիչը, կային գոլային պահեր, եթե իրացնեինք, ապա կհաղթեինք»:

Պետրոս Ավետիսյանի մասին

«Մեծ հույսեր եմ կապում Պետրոս Ավետիսյանի հետ, նա մեր հավաքականի ապագան է: Շատ լավ վիճակում է ու պատրաստ է խաղալ»:

Կոչ երկրպագուներին

«Վստահ եմ, որ «Փյունիկի» ու «Ալաշկերտի» հաջողություններն էլ երկրպագուների աջակցության շնորհիվ էր: Ցանկալի է, որ գան և երկրպագեն, քանի որ նաև նրանց օգնության շնորհիվ կարող ենք հաղթանակի հասնել: Սա միայն մեր ֆուտբոլիսների կամ հավաքականի խաղը չէ, այլ ամբողջ ազգի պատվի հանդիպումն է: Հավաքականը ոչ միայն պատիվ է մեր համար, այլ նաև շատ մեծ պատասխանատվություն:»

Խոսելով Հայաստանի ֆուտբոլի ֆեդերացիայի նախկին ղեկավարության գործելաոճի մասին՝ նորանշանակ մարզիչն ասաց, որ իրավիճակ է փոխվել, նախկինում չի աշխատել և չգիտի:

Հիշեցնենք, որ Հայաստան-Ջիբրալթար հանդիպումը կկայանա Վ. Սարգսյանի անվան «Հանրապետական» ստադիոնում, մեկնարկը՝ 20:00-ին:

Ազգերի լիգայի D դիվիզիոնի 4-րդ խմբում առաջատարը Մակեդոնիայի հավաքականն է՝ 6 միավորով: Հայաստանի ու Լիխտենշտեյնի ընտրանիներն ունեն 3-ական միավոր, իսկ Ջիբրալթարը դեռևս միավոր չունի:
 

Աղբյուր` armsport.am