Փաստ ինֆո

Պետական վերահսկողական ծառայության պետ Դավիթ Սանասարյանը Մարալիկում վստահեցրեց, որ ուսումնասիրություն են կատարելու և հատ առ հատ նայելու են, թե պետբյուջեի միջոցները ինչպես են ծախսվել:

«Ես համայնքապետից հրաժարական պահանջելու իրավասություն չունեմ, դա ձեր իրավասությունն է, դուք պահանջում եք: Որևէ մեկը ո´չ գյուղապետ, ո´չ քաղաքապետ, ո´չ նախագահ չի ծնվել, ճգնաժամի լուծման տարբերակ կա»,-ասաց Սանասարյանը՝ հիշեցնելով վարչապետի կոչը, թե եթե համայնքապետերը արդար են ընտրված և կարծում են, որ այդքան ուժեղ են, ապա թող հրաժարական տան, նոր ընտրություններին առաջադրեն իրենց թեկնածությունը:

«Խնդրում եմ այստեղ թշնամիներ չփնտրել, այստեղ մենք բռունցքվելու կարիք ունենք, «իմոնք», «քոնոնք» հասկացություններ չպետք է լինեն»,-ասաց նա:

Դավիթ Սանասարյանը լրագրողներին ասաց, որ Մարալիկ են եկել՝ հասկանալու՝ ինչից են բողոքում բնակիչները, ըստ նրա՝ հատկապես չարաշահումների վերաբերյալ բողոքներ են ստացել. Այստեղ ճգնաժամ կա, ուզում ենք հասկանալ՝ ինչու են բողոքում այս մարդիկ… Պետք է օբյեկտիվ լինենք, մենք բոլոր դեպքերում այդպես ենք լինելու: Նախորդ կառավարությունից տարբերվում ենք նրանով, որ այս կամ այն թայֆայի մտածելակերպ չունենք, մենք ուզում ենք օրինականություն տիրի, մեր գործը ուսումնասիրություններն են»,-ասաց նա:

Աղբյուր` Փաստինֆո