Փաստ ինֆո

Հատուկ քննչական ծառայությունը գործարար, Հ2 հեռուստաընկերության սեփականատեր Սամվել Մայրապետյանի նկատմամբ մեղադրանք է առաջադրել ՀՀ քրեական օրենսգրքի 38-311 հոդվածի հատկանիշներով՝ «կաշառք ստանալուն օժանդակելը», - Aysor.am-ի թղթակցի հետ զրույցում տեղեկացրեց ՀՔԾ մամուլի խոսնակ Մարինա Օհանջանյանը։

Այլ մանրամասներ, սակայն, ՀՔԾ-ից չեն փոխանցում։

Մայրապետյանի փաստաբան Կարեն Բատիկյանը ևս Aysor.am-ին տեղեկացրել է, որ Մայրեպետյանին մեղադրանքն առաջադրվել է ՀՀ քրեական օրենսգրքի 38-311 հոդվածի հատկանիշներով՝ «կաշառք ստանալուն օժանդակել»։

«Պարոն Մայրապետյանը չի ընդունում իրեն առաջադրված մեղադրանքը», - ասաց փաստաբանը։

Նա նաև տեղեկացրեց, որ ՀՔԾ-ն Մայրապետյանի նկատմամբ որպես խափանման միջոց կալանքն ընտրելու մասին միջնորդություն է ներկայացրել դատարան, և այժմ Մայրապետյանի ներկայությամբ դատարանքը քննում է այդ միջնորդությունը։

«Այս պահին նա դատարանում է», - ասաց Բատիկյանը։

Նա հրաժարվեց այլ մանրամասներ հայտնել՝ նշելով, որ ստորագրությամբ պարտավորվել է նախաքննական գաղտնիություն պարունակող տեղեկություն չհրապարակել։

Ավելի վաղ մեկ այլ գործարար Սիլվա Համբարձումյանը Aysor.am-ի թղթակցի հետ զրույցում ասել էր, որ Մայրապետյանի հետ ՀՔԾ-ում ունեցել է առերեսում, որից հետո իր կարգավիճակը կասկածյալից դարձել է վկայի։ Համբարձումյանը նաև ասել էր, որ քրեական գործը կաված է մարտի 1-ի գործի հետ։

Սակայն փաստաբան Բատիկյանը հերքեց այդ տեղեկությունը. «Ես հաստատապես կարող եմ ասել, որ Սամվել Մայրապետյանը այդ գործի հետ որևէ առնչություն չունի»։

Աղբյուր` Փաստինֆո