Փաստ ինֆո

Երևանի ավագանու ԲՀԿ խմբակցությունը որոշել է հրաժարվել իրեն տրամադրվող ծառայողական մեքենաներից։ Այս մասին լրագրողներին այսօր հայտնել է ավագանու ԲՀԿ խմբակցության ղեկավար Արման Աբովյանը։

«Սրանով ցույց ենք տալիս մեր աշխատանքի հիմնական ուղղությունները։ Կոչ եմ անում մեր գործընկերներին նույն քաղաքականությունը որդեգրել, մեր ապագա քաղաքապետին, թաղապետերին՝ հրաժարվել ծառայողական մեքենաներից», - ասաց Արման Աբովյանը։

Նա նշեց՝ պետք է մտածեն Երևանի բյուջեն ոչ միայն ավելացնելու, այլև եղածն արդյունավետ ծախսելու ուղղությամբ։

Անդրադառնալով ավագանիում մյուս քաղաքական ուժերի հետ համագործակցությանը՝ Ա.Աբովյանը նշեց, որ տրամադրվածությունը դրական է։

«Արհեստականորեն լարվածություն են փորձում մտցնել։ Մենք իրար թշնամի չենք։ Մենք այս գործընթացի մեջ մենք ներգրավվել ենք, որպեսզի Երևանի առաջ եղած խնդիրները լուծվեն։ Դրա հետ մեկտեղ մենք երբեք մեզ թույլ չենք տա հնազանդ համաձայնել ամեն ինչի հետ ու մեզ թույլ չենք տա նաև կատաղի ընդդիմանալ ամեն ինչին։ Աշխատելու ենք, իսկ թե ինչպես կստացվի համագործակցությունը՝ ցույց կտա ժամանակը։ Մեր տրամադրվածությունը շատ դրական է», - ասաց Արման Աբովյանը։

Նա հորդորեց երևանցիներին իրենց «հանգիստ չթողնել» ու դիմել բոլոր խնդիրների դեպքում։

Իսկ ինչ վերաբերում է  քարոզարշավի ընթացքում հնչած հայտնի «սև-սպիտակ» բաժանմանը, ապա ԲՀԿ խմբակցության ղեկավարի դիրքորոշումը նույնն է և այն համարում է անընդունելի։  «Բացարձակ անընդունելի է մարդկանց կիսել սև-սպիտակների։ Տեսականորեն սև ու սպիտակը նստում են նույն վերելակը, նույն երթուղայինները։ Մենք չենք երանգավորելու ու պայքարելու ենք բոլոր իրավական մեթոդներով, որ այդ սև-սպիտակ գաղափարը հանվի։ Մեր գույնը միայն մեկն է՝ մենք հայ ենք», - ասաց բանախոսը։

Աղբյուր` Փաստինֆո