Փաստ ինֆո

Եթե որևէ մեկը որոշել է, որ պետք է մտնի հայ ժողովրդին խանգարողի ու հայ ժողովրդի համար պրոբլեմներ ստեղծողի դերակատարման մեջ, ժողովուրդն այդ պրոբլեմը լիկվիդացնելու ձևը կգտնի: Այս մասին այսօր լրագրողների հետ զրույցում ասել է Նիկոլ Փաշինյանը։

Լրագրողի այն դիտարկմանը, թե սահմանադրական չէր, որ պաշարվել էր Ազգային ժողովը, պատգամավորների վրա ճնշում էր գործադրվել, Նիկոլ Փաշինյանն ասել է, թե պատգամավորը պետք է ներկայացնի ժողովրդին։

«Երբ պատգամավորը չի ներկայացնում ժողովրդին, ինքը պետք է մտածի իր մանդատի մասին: Ասում են, որ իրենք ունեն կողմնակիցներ ու պատրաստվում են ցույցեր անել, խնդրեմ, թող անեն, Հայաստանում երաշխավորված է ցույցեր անելու իրավունքը, և ես էլի ասում եմ, որ լրջորեն կքննարկեմ այդ հանրահավաքում ելույթ ունենալու հնարավորությունը, ես ասում եմ սա ամենայն լրջությամբ», - ասել է ՀՀ վարչապետը՝ հավելելով, որ այս Ազգային ժողովը դե ֆակտո լուծարված է, մնում է դե յուրե այն լուծարել։

Իսկ լրագրողի այն դիտարկմանը, թե, ասում են, Նիկոլ Փաշինյանը մտավախություն ունի, որ իր ռեյտինգը կընկնի, ՀՀ վարչապետը պատասխանել է. «Կարող եմ խորհուրդ տալ հետևյալը՝ բացեք և կարդաք մայիսին վերլուծաբանների վերլուծությունները, ովքեր ասում էին, որ անխուսափելիորեն հինգ ամսից իմ վարկանիշը գահավիժելու է, փաստերեն, օրեր առաջ տեղի է ունեցել հարցում ու պարզվել է, որ ժողովրդի վստահությունը պետության ղեկավարի նկատմամբ երրորդ Հանրապետության պատմության համար աննխադեպ է»։

Լրագրողներից մեկը նաև անդրադարձել է ԵԽԽՎ զեկուցողների արձագանքին՝ հիշեցնելով, որ նրանք դժգոհ են Նիկոլ Փաշինյանի աշխատանքից: Ի պատասխան վարչապետն ասել է, որ ինչքան շփվել է միջազգային ներկայացուցիչների հետ, առայժմ որևէ դժգոհություն չի տեսել։

Աղբյուր` Փաստինֆո