Փաստ ինֆո

«Մոդուս վիվենդի» վերլուծական կենտրոնի տնօրեն Արա Պապյանի կարծիքով՝  արտահերթ խորհրդարանական ընտրությունների կազմնակերպելու համար Նիկոլ Փաշինյանի հրաժարական տալու հայտարարությունը ռիսկային է։

«Հրաժարական տալու և նոր վարչապետ չառաջադրելու միջոցով արտահերթ խորհրդարանական ընտրություններ իրականացնելու վերաբերյալ Նիկոլ Փաշինյանի հայտարարությունը ես ռիսկային եմ համարում, որովհետև վստահություն կա, որ նրանք անպայմանորեն կառաջադրեն իրենց թեկնածուն, ինչը կանխելը դժվար է լինելու։ Անհնարին ծրագիր է՝ երկու շաբաթ շրջափակած պահել ԱԺ շենքը և թույլ չտալ, որ վարչապետի ընտրություն տեղի ունենա։ Պարտադիր չէ, որ բոլորն այնտեղ ներկա գտնվեն, բավարար է, որ քվորում լինի, մյուսներն էլ իրենց քվեն գրավոր ձևով ուղարկեն»,- այսօր տեղի ունեցած ասուլիսում  ասաց նա։

Տեսականորեն, նրա կարծիքով, բացառված չէ, որ որեւէ քաղաքակն ուժի կողմից եթե այդ երկշաբաթյա ժամկետում վարչապետի թեկնածու  առաջադրվի, որի պարագայում  բախումներն անխուսափելի են։

«Պետք է դուրս գալ կաղապարներից և գործել այն տրամաբանությամբ, որ երկրում հեղափոխություն է կամ հեղափոխության փորձ։ Ապօրինության վրա չի կարող օրինականություն խարսխվել։ Ակնհայտ է, որ մեզ մոտ տարիներ շարունակ եղել է ապօրինություն, այն Սահմանադրությունը, որի վրա Նիկոլ Փաշինյանն ուզում է խարսխել իր ողջ գործունեությունը, ապօրինի է։ Այդ համոզումը ժողովրդի մեջ եղել է, նաև ԱԺ ընտրություններն են եղել ապօրինի։ Հիմա այդ ապօրինությունն ինչո՞ւ պետք է դառնա օրինականության և մեր գործունեության հիմք»,- աշեց բանախոսը

Նրա խոսքերով՝ իրավիճակը օրեցօր  փոխվում է. «Հակահեղափոխությունը բացահայտ հարձակման է անցնում, մարդիկ, որ այսօր պետք է սեղանի տակ թաքնված լինեին, սպառնում են։ Սա արդեն վտանգում է ոչ միայն հեղափոխությունը, այլև բոլորիս։ Չի կարելի հետհեղափոխական վիճակը կառավարել նախահեղափոխական, հատկապես՝ հատուկ մարդկանց համար կարված-ձևված օրենքներով և Սահմանադրությամբ»։

Աղբյուր` Փաստինֆո