Փաստ ինֆո

Ազգային ժողովում կառավարության հետ հարցուպատասխանի ժամանակ ուշագրավ երկխոսություն տեղի ունեցավ ՀՀ վարչապետ Նիկոլ Փաշինյանի և ԱԺ ՀՅԴ խմբակցության քարտուղար Արմենուհի Կյուրեղյանի միջև: Վարչապետին ուղղված իր հարցը ՀՅԴ խմբակցության քարտուղարը սկսեց մաթեմատիկական պարադոքսի ներկայացմամբ, որից հետո անցավ իր հարցին:

«Մաթեմատիկական տրամաբանության մեջ հայտնի են խնդիրներ, պարադոքսներ, որոնց համար հնարավոր չէ ապացուցել թե՛ լուծելիությունը,  թե՛ անլուծելիությունը: Տարածված այդ պարադոքսի խնդիրներից է ստախոսի խնդիրը, վարսավիրի խնդիրը և այլն: Վարսավիրի խնդիրը մի քիչ ավելի արդիական է և փորձեմ ներկայացնել այդ խնդիրը: Գյուղում ապրում է մի վարսավիր, ով սափրում է այդ գյուղում ապրող այն գյուղացիներին, ովքեր իրենք իրենց չեն սափրում: Հիմա հարց՝  այդ վարսավիրը ի՞նքն  է իրեն սափրում է, թե՞ ոչ: Եթե վարսավիրը ինքն իրեն սափրում է, ապա ըստ կանոնի ինքն իրեն չպետք է սափրի:

Եթե վարսավիրը ինքն իրեն չի սափրում, ապա,  ըստ կանոնի,  ինքն իրեն պետք է սափրի: Ստացվում է հակասություն: Հիմա նման հակասությամբ խնդիր ձևակերպեցի ես ինքս ինձ համար Երևանի ավագանու ընտրություններում «Իմ քայլը» դաշինքի քարոզարշավին, երբ Դավիթաշեն վարչական շրջանում ելույթ էր ունենում վարչապետ Նիկոլ Փաշինյանը կամ Նիկոլ Փաշինյանը: Հիմա, եթե նա այնտեղ որպես վարչապետ էր ելույթ ունենում, ապա ինչո՞ւ դա չի դիտվելու որպես պաշտոնի չարաշահում, իսկ եթե նա ելույթ էր ունենում որպես «Քաղաքացիական պայմանագիր» կուսակցության նախագահ, ապա ինչպե՞ս էր նա այդ հարթակից հրահանգ իջեցնում: Այդ պահին դուք հարթակում վարչապետ Նիկոլ Փաշինյանն էի՞ք, թե «Քաղաքացիական պայմանագիր» կուսակցության  ղեկավար Նիկոլ Փաշինյանը»,- հարցրեց Կյուրեղյանը:

ՀՀ վարչապետ Նիկոլ Փաշինյանը պատգամավորի հարցին տվեց հետևյալ պատասխանը. «Ձեր՝ այս անգամ ոչ որպես միամիտ լոռեցու հարցին,  պատասխանեմ միամիտ կերպով: Ես պարզապես Նիկոլ Փաշինյանն էի»:

Արմենուհի Կյուրեղյանն օգտվեց արձագանքելու իրավունքից և խնդրեց հստակ պատասխանել իր երկու հարցին: «Կխնդրեի իմ երկու հարցերին հստակ պատասխան, եթե Դուք որպես վարչապետ էիք ելույթ ունենում, ապա ինչպե՞ս դա չի դիտվում որպես պաշտոնի չարաշահում, իսկ եթե որպես «Քաղաքացիական պայմանագիր» կուսակցության ղեկավար էիք ելույթ ունենում, ապա ինչպե՞ս էիք հանձնարարականներ տալիս: Վերջերս մեր հանրության մի մասի մոտ կարծիք է, որ դուք շատ արագ կերպարանափոխվում եք վարչապետից մինչև հանրահավաքի ղեկավար: Բնականաբար, շատերը ձեր կերպարի մեջ ավելի շատ կցանկանային տեսնել վարչապետին, ոչ թե հանրահավաքների կազմակերպչին: Դուք ինքներդ քա՞նի տոկոս եք ձեր մեջ համարում վարչապետ և քա՞նի տոկոս հանրահավաքի ղեկավար: Միայն թե չասեք հավասար կամ ավելի շատ վարչապետ, որովհետև դա անազնիվ կլինի»,- ասաց պատգամավորը:

ՀՀ վարչապետը տվեց հետևյալ պատասխանը. «Գիտեք, անկեղծ ասած, Հայաստանում կան քաղաքական ուժեր, որոնք ավելի արագ են կերպարանափոխվում և ավելի մեծ ամպլիտուդներով, իսկ, ընդհանուր առմամբ կարող եմ ասել, որ ես սովորաբար իմ դիրքորոշումներում, ասելիքներում և անելիքներում սիրում եմ լինել համարժեք:  Ես տվյալ դեպքում կարող եմ արձանագրել, որ ձեր հարցին պատասխանեցի: Ես ասում եմ, որ հիմա էլ եմ Նիկոլ Փաշինյանը և այն, ինչ այստեղից ասում եմ շատ բաներ կարող եմ ասել նաև հանրահավաքում, գուցե, մի քիչ ավելի բարձր, որպեսզի վերջին շարքերում լսելի լինի, իսկ քանի որ Ազգային ժողովի շարքերը նոսրացել  են և գնալով նոսրանում են,  այդ հանգամանքը ինձ հնարավորություն է տալիս նաև այսպես պատասխանել ձեր հարցին: Ինչ վերաբերվում է իմ ելույթին, այնտեղ որտեղ ես խոսել եմ որպես վարչապետ և այն, ինչ ես խոսել եմ որպես վարչապետ,  չի վերաբերվել նախընտրական քարոզչությանը, իսկ ինչ վերաբերվել է նախընտրական քարոզչությանը, ես խոսել եմ որպես մի մարդ, ով իրավունք ունի խոսել նախընտրական քարոզչության մասին»:

Աղբյուր` Փաստինֆո