Փաստ ինֆո

ՀՀ ազգային ժողովի հերթական նիստում կառավարության ներկայացուցիչ, ՀՀ արդարադատության փոխնախարար Արթուր Հովհաննիսյանն ԱԺ փոխնախագահ Արփինե Հովհաննիսյանի՝ քննիչ հանձնաժողովներում նաև պաշտոնաթող անձանց պարտադիր ներկայանալու վերաբերյալ նախագիծը թերի և բացասական է համարում: Նրա կարծիքով՝ կառավարությանը՝ նախագծին ծանոթանալու բավարար հնարավորություն չեն տվել: Նման տեսակետ նա հայտնեց ԱԺ հերթական նիստում:

«Նախագծի վերաբերյալ երեկ կառավարության առաջարկն էր՝ միանշանակ  հստակեցնել, որ խոսքը վերաբերում է այն պաշտոնաթող անձանց պարտականությանը, ովքեր այդ պարտականությունը ձեռք են բերել պաշտոնը զբաղեցնելու ընթացքում, իսկ քննիչ հանձնաժողովը ձևավորվել և այդ անձին հրավիրել է, երբ նա դեռ զբաղեցնում էր այդ պաշտոնը, և պաշտոնը թողել է քննիչ հանձնաժողովի հրավերքից հետո: Այս մասով խնդիր չունի կառավարությունը: Սակայն Գևորգ Պետրոսյանի առաջարկով՝ նախագծի թղթային տարբերակը մեզ հասանելի դարձավ  միայն երեկ երեկոյան: Եվ ամբողջությամբ պատրաստվել և դիրքորոշում հայտնելու հնարավորություն չունեցանք: Եվ այստեղ փաստորեն գործեց այն մեխանիզմը, որով նախկին կառավարությունն էր բերում նախագծերը և հանձնաժողովներում  ընթերցումների արանքում փոփոխություններ անում: Պատգամավորները մշտապես բողոքում էին, որ չեն հասցնում արտահայտել իրենց դիրքորոշումը: Հիմա, փաստորեն, կառավարությունն է ընկել այդ նույն դրության մեջ»,-ասաց Արթուր Հովհաննիսյանը:

Նա նշեց՝ երբ ԱԺ-ի կողմից երկրորդ անգամ վարչապետի ընտրություններ տեղի ունենան, և երկու շաբաթ շարունակ ԱԺ-ն ձախողի  վարչապետ ընտրելը, խորհրդարանն իրավունքի ուժով պիտի ցրվի: Իսկ Արփինե Հովհաննիսյանի առաջարկով՝ եթե ընտրության օրը խոչընդոտվի պատգամավորների ներկայությունը նիստին և, հետևաբար, քվեարկությանը, ապա նիստը պարզապես չպետք է կայանա:  «Առաջակը նրա համար էր, որ կանխեն խորհրդարանը ցրելու հնարավորությունը»,-նշեց փոխնախարարը:

Նա իրավական տեսանկյունից ևս նախագծում մի քանի խնդիրներ տեսավ: Հետաքրքրվեց՝ ով է  որոշում պատգամավորների ներկայանալը խոչընդոտող  արտակարգ իրավիճակներն առկա են, թե ոչ, խոչընդոտվում է պատգամավորի  մասնակցությունը, թե ոչ, առկա է սպառնալիք, թե ոչ: Արթուր Հովհաննիսյանը նկատեց՝ փաստորեն այս հարցի որոշումը թողնված է միանձնյա ԱԺ պատգամավորին: «Շատ հարցեր նախագծով բաց են մնում: Մեր դիրքորոշումը, որը կարճ ժամանակում է  ձևավորել, բացասական է, կարծում ենք, որ կարգավորումները թերի են»,-եզրափակեց փոխնախարարը:

ԱԺ ՀՀԿ խմբակցության պատգամավոր Արփինե Հովհաննիսյանն ԱԱԾ և ՀՔԾ պետերի հեռախոսազրույցի գաղտնալսման հարցով ստեղծված ԱԺ քննիչ հանձնաժողովում հոկտեմբերի 1-ին ներկայացրեց նախագիծ՝ ըստ որի հանձնաժողովի հրավերով նիստերին պիտի ներկայանան նաև տեղեկատվություն ունեցող, սակայն հանձնաժողովի գործունեության ընթացքում պաշտոնավարումը դադարեցրած անձինք:

Աղբյուր` Փաստինֆո