Փաստ ինֆո

Հողը պետք է մշակվի ժամանակակից տեխնոլոգիաներով, ինչը հնարավորություն կտա, որ գյուղացիներն իսկապես շոշափելի եկամուտներ ստանան:

Արարատի մարզպետարանում մարզի համայնքի ղեկավարների հետ հանդիպման ժամանակ այս մասին ասաց ՀՀ վարչապետ Նիկոլ Փաշինյանը:

«Արարատի մարզը Հայաստանի ամենախոշոր գյուղատնտեսական մարզերից է, ինչպես նաև այստեղ կան արդյունաբերական ձեռնարկություններ:  Շատ կարևոր է ծանոթանալ իրավիճակին  և տեղեկանալ, թե ինչ  ակնկալիքներ ունեն մարզի  բնակիչները և ղեկավարները կառավարությունից»,- ասաց Փաշինյանը:

Նա ասաց, որ ինքը մի քանի անգամ առիթ ունեցել է խոսել երկարաժամկետ խնդիրների մասին, այն է՝ Հայաստանը ագրարային երկրից դարձնել արդյունաբերական երկիր:

«Բայց դա չի նշանակում, որ  գյուղատնտեսությունը երկրի  այդպիսի մոդելում  իր տեղը  չունի, ընդհակառակը՝ մենք հույս ունենք,  որ  այս գործընթացի ընթացքում մեր գյուղատնտեսության արդյունավետությունն էականորեն կաճի:

Արդյունավետության աճ ասելով՝ ի նկատի ունեմ, որ  հողը կմշակվի ժամանակակից տեխնոլոգիաներով, ինչը հնարավորություն կտա, որ մեր գյուղացիները իսկապես  շոշափելի եկամուտներ ստանան և հողի մշակումը  դառնա իսկապես եկամտի լրջագույն աղբյուր, որպեսզի մարդիկ ոչ թե կարողանան ծայրը ծայրին հասցնել, այլև կարողանան իրանց աշխատանքի արդյունքը ստանալ և բարեկեցություն ապահովել»,- ասաց Փաշինյանը:

Աղբյուր` Փաստինֆո