Փաստ ինֆո

 ԱԱԾ և ՀՔԾ պետերի հեռախոսազրույցի հրապարակման դեպքի մանրամասները քննելու նպատակով քննիչ հանձնաժողովի ստեղծումը ՀՀ ազգային ժողովի «Ելք» խմբակցության պատգամավորներ Էդմոն Մարուքյանն ու Ալեն Սիմոնյանը ԱԺ կանոնակարգի կոպիտ խախտում են համարում:

Պատգամավորները նման տեսակետ հայտնեցին հանձնաժողովի ստեղծման համար հրավիրված արտահերթ նիստում:

«Ձեր ստորագրահավաքի տեքստում գրված է, որ համացանցում հայտնվել է այս-այս ձայնագրությունը, նշվում է, որ արդարադատությանը խոչընդոտելու, հեռախոսային խոսակցությունների գաղտնիությունը խախտելու փաստերն ուսումնասիրելու մասին Քննիչ հանձնաժողով ստեղծել։ Հիմա հանձնաժողով եք ստեղծել առանց ԱԺ կանոնակարգ սահմանադրական օրենքի դրույթը հաշվի առնելու։  Մենք ուսումնասիրեցինք «ԱԺ կանոնակարգ»-ը և դրանում քննիչ հանձնաժողով ստեղծելու սահմանափակում տեսանք: Զարմացած եմ, որ դա վրիպել է ձեր աչքից: Քննիչ հանձնաժողով չի կարող ստեղծվել, եթե նախաքննություն է ընթանում: Երկու դեպքերով էլ նախաքննություն է ընթանում, կա մամուլի հաղորդագրություն, որ քրեական գործեր են հարուցված: Դրա համար ԱԺ-ն չի կարող ստեղծել այդպիսի հանձնաժողով»,-շեշտեց Էդմոն Մարուքյանը:

Ըստ նրա՝ հանձնաժողով չեն կարող հրավիրել այդ գործով անցնող մարդկանց, հարցեր տալ, քանի որ նրանք արդեն իսկ քրեական գործի շրջանակներում մասնակցում են հարցաքննությունների։ Նրա խոսքով` իրենք դեմ չեն ճշմարտության պարզաբանմանը, այլ դեմ են ԱԺ կանոնակարգ սահմանադրական օրենքի խախտմանը։ «Քրեական գործը հարուցված չլիներ, որևէ խնդիր չկա, կարող էինք ստեղծել հանձնաժողով», - ասաց Մարուքյանը։

Նույն պատճառաբանությամբ նախաձեռնությանը դեմ արտահայտվեց նաեւ խմբացկության մեկ այլ պատգամավոր Ալեն Սիմոնյանը։ «Ինչ մեկնաբանություն անեք, ինչ գեղեցիկ տեսքով էլ մշակեք, գրքային ճշմարտությունը մեկն է՝ Կանոնակարգ օրենքը արգելում է նման հանձնաժողով ստեղծելու հանրավորությունը։ Դուք կարող եք կրկին փորձել ստեղծել նման հանձնաժողով և եթե այն կհամապատասխանի ԱԺ Կանոնակարգ օրենքին, ամենայն հավանականութամբ մենք կմիանանք, բայց մենք օրենք չենք խախտի», - հայտարարեց նա։

Աղբյուր` Փաստինֆո