Փաստ ինֆո

ՀՔԾ պետ Սասուն Խաչատրյանը հաստատում է, որ ինքը տեղյակ է պահել վարչապետ Նիկոլ Փաշինյանին Մարտի 1-ի գործով անցնող դեպքերի մասին:

«Ես պարոն վարչապետին տեղյակ եմ պահել, որ Մարտի 1-ի գործով անցնող անձանց կալանավորվելու միջնորդություններ ներկայացվելու են իմ կողմից, ինչը և արվել է Յուրի Խաչատուրովի դեպքում»,-այսօր լրագրողների հետ հանդիպմանն ասաց ՀԾՔ պետը՝ անդրադառնալով իր ու ԱԱԾ տնօրեն Արթուր Վանեցյանի մասնակցությամբ ձայնագրությանը:

«Ես ասել եմ՝ քանի որ այս գործով բարձրաստիճան անձիք են անցնում ու ի վիճակի են խոչընդոտել քննությանը, այդ գործում կալանքի կիրառումը կարող է շատ արդյունավետ լինել»,-նշեց Ս. Խաչատրյանը:

Նա ասաց, որ սա գնահատում է Մարտի 1-ի բացահայտմանը խոչընդոտելու փորձ:

«Սա հանցնանք է , սա միտված է մեր գործունեությունը կասեցնելուն, իսկ մենք փորձում ենք արմատախիլ անել կոռուպցիան այս ոլորտում, մենք փորձում ենք վերադարձնել ժողովրդից տարած միլիարդները»,-ասաց ՀՔԾ պետը:

Բացի այդ ՀՔԾ պետը հայտարարեց, որ բանակը ոչ միայն մասնակցել է Մարտի 1-ի դեպքերի, այլ կրակել է Մարտի 1-ին:

«Մենք ունենք կոնկրետ ապացույցներ, որ ՀՀ ԶՈՒ զինծառայողները ավտոմատ հրազենից կրակ են արձակել Լեո փողոցի շենքերի ուղղությամբ»,- ասաց նա:

ՀՔԾ պետը շեշտեց՝ բանակն ամբողջ ծավալով մասնակցել է գործողություններին:

Սասուն Խաչատրյանն ասաց, որ մի բացահայտում կանի, որի մասին այդքան էլ չէր ցանկանում խոսել:

«Գաղտնի հրամանից հետո, երբ որոշվել է Երևանում հավաքել տարբեր զորամիավորումների զինծառայողների, սահմաններում շաբաթներով զինվորները հերթապահել են առանց հերթափոխի, ստեղծվել են շատ վտանգավոր դեպքեր, եղել է նաև դիվերսիա»,-նշեց նա:

ՀՔԾ պետը շեշտեց՝ ամենախայտառակ բանը, որը արել են՝ բանակի զինվորներին վարձականներ սարքելն է:

«Օլիգարխների կողմից փետրվարի 23-ից մարտի 8-ը զինվորներին գումար են բաժանել, որ նրանք պաշտպանեն իրենց»,-ասաց ՀՔԾ պետը:

Դիտարկմանը՝ անուններ տվեք՝ ՀՔԾ պետն ասաց. «Անուններ նշեմ, որ փախնե՞ն»:

Աղբյուր` Փաստինֆո